काठमाडौं - अमेरिका–इजरायल र इरानबीचको युद्ध चर्किँदै जाँदा आज बिहान एशियाली बजारमा विश्वभरका तेलको मूल्य तीव्र रूपमा बढेको छ र सेयर बजारमा ठूलो गिरावट आएको छ।
ब्रेन्ट कच्चा तेलको मूल्य ३ प्रतिशत भन्दा बढीले बढेर प्रति ब्यारेल ११५ डलरभन्दा माथि पुगेको छ भने अमेरिकी बजारमा कारोबार हुने तेलको मूल्य करिब ३.५ प्रतिशत बढेर १०३ डलर पुगेको छ।
यसले ब्रेन्ट तेललाई इतिहासकै सबैभन्दा ठूलो मासिक वृद्धि तर्फ लैजाने संकेत देखाएको छ।
एशियाका सेयर बजारहरू घटेर खुलेका छन्। जापानको निक्केई २२५ करिब ४.५ प्रतिशतले घटेको छ भने दक्षिण कोरियाको कोस्पी सूचक पनि करिब ४ प्रतिशतले तल झरेको छ।
यसको मुख्य कारण यमनका इरान समर्थित हुथी विद्रोहीहरूले सप्ताहन्तमा इजरायलमाथि आक्रमण गर्दै युद्धमा प्रवेश गर्नु हो। साथै इरानले अमेरिकी र इजरायली अधिकारीहरूको घर तथा विश्वविद्यालयहरूमा पनि प्रति आक्रमण विस्तार गर्ने चेतावनी दिएको छ।
अमेरिकी राष्ट्रपति डोनाल्ड ट्रम्पले आइतबार फाइन्सियल टाइम्ससँगको अन्तर्वार्तामा इरानको तेल नियन्त्रण गर्न सक्ने र यसको मुख्य तेल केन्द्र खार्ग टापु कब्जा गर्न सक्ने बताएका थिए।
इरानको संसदका सभामुखले भने थप ३ हजार ५ सय अमेरिकी सैनिक मध्यपूर्वमा पुगेपछि आफ्ना सेना अमेरिकी सैनिकहरूको प्रतीक्षामा रहेको चेतावनी दिएका छन्।
यसबीच तेहरानले होर्मुज जलडमरू मध्य पार गर्ने जहाजहरूमा आक्रमण गर्ने धम्की दिएपछि विश्व ऊर्जा बजार अत्यन्त अस्थिर बनेको छ।
विश्वका लागि अत्यन्त महत्वपूर्ण यो जलमार्गबाट तेल र ग्यास ढुवानी लगभग ठप्प जस्तै भएको छ जसका कारण तेल र ग्यासको मूल्य झन् बढेको छ।
फेब्रुअरी २७ मा ब्रेन्ट तेलको मूल्य करिब ७२ डलर प्रति ब्यारेल थियो तर मार्च १८ मा यो बढेर ११९.५० डलरसम्म पुगेको थियो जुन जून २०२२ पछिकै उच्च स्तर हो।
समग्रमा युद्ध अझै बढेमा विश्व अर्थतन्त्र, ऊर्जा आपूर्ति र बजारहरूमा अझ ठूलो प्रभाव पर्ने चेतावनी दिइएको छ।
0 comment