काठमाडौं - अमेरिकाको मिशिगन स्टेट युनिभर्सिटीमा गोली चल्दा ३ जनाको मृत्यु भएको छ भने ५ जना घाइते भएका छन् । 

प्रहरीका अनुसार सोमबार राति विश्वविद्यालयका दुई स्थानमा गोली हानाहान भएको थियो । मास्क लगाएका होचो कदका व्यक्तिले गोली चलाएका अनुमान गरिएको छ । अभियुक्तको खोजी भइरहेको छ । 

विश्वविद्यालय प्रशासनले विद्यार्थीहरूलाई तत्काल सुरक्षित रहन सन्देश प्रवाह गरेको थियो । गोलीकाण्डबारे जानकारी प्राप्त हुनेबित्तिकै करिब ३० वटा दमकल, एम्बुलेन्स र अन्य आपत्कालीन सवारी साधन विश्वविद्यालय पुगेका थिए । चार घण्टासम्म विश्वविद्यालयको वातावरण तनावग्रस्त भएको थियो ।

एशोशिएटेड प्रेसका अनुसार आक्रमणकारी पनि मारिएको छ । आक्रमणकारीको नाम भने सार्वजनिक गरिएको छैन । निजको विश्वविद्यालयसँगको संलग्नताबारे पनि केही उल्लेख गरिएको छैन ।