काठमाडौं - पछिल्लो समय विराटनगरमा डेंगु संक्रमणको जोखिम बढ्दै गएको छ।
फोहोर व्यवस्थापन र लामो समयदेखि लामखुट्टे मार्ने विषादी छर्किने कार्य नहुँदा डेंगु संक्रमणको जोखिम बढ्दै गएको हो। व्यवस्थित उपचार र जोखिम पूर्वानुमानको कार्यसमेत नभएपछि यसले थप चुनौती थपेको छ।
विराटनगरस्थित कोशी अस्पतालले दिएको तथ्यांक अनुसार पछिल्लो हप्ता दुई जनामा डेंगुको संक्रमण पुष्टि भएको छ। भदौ ८ गतेदेखि १६ गतेसम्म आरिडिटी प्रविधिबाट १९ जनामा रगतको सेरोलोजी परीक्षण गर्दा विराटनगरकै दुई जनामा डेंगु पोजिटिभ देखिएको हो।
हाल उनीहरूको उपचार भइरहेको अस्पतालकी कन्सल्टेन्ट प्याथोलोजिष्ट डा. प्रतिक्षा कार्कीले बताइन्। कोशी अस्पतालमा केही दिनयता दिनहुँ डेंगुसँग मिल्दोजुल्दो लक्षण लिएर आउने बिरामीको चाप समेत बढेको छ।
अस्पतालको आकस्मिक कक्षमा टाउको तथा मांसपेसी दुख्ने, वाकवाक लाग्ने, वान्ता हुने र ग्रन्थी सुन्निने लगायतका समस्या लिएर आउने बिरामीहरू बढेको अस्पतालका औषधि विभाग प्रमुख डा. दिपक सिग्देलले बताए।
उनले बुधबार मात्रै काठमाडौंबाट आएका चार जनामा डेंगु देखिएको जानकारी दिए। उनले भने, 'उपत्यकामा डेंगुको प्रकोप उच्च छ। उताबाट फर्किएका ७० प्रतिशतमा डेंगु देखिएको छ।'
डेंगुको रोकथामका निम्त्ति भेक्टर लक्षित उपायहरू अपनाउनु पर्ने चिकित्सकको सल्लाह छ। लामखुट्टेको प्रजनन रोकथाम तथा सरसफाईमा विशेष ध्यान पुर्याउनु पर्ने उनीहरू बताउँछन्।
डेंगुको प्रकोपबाट जोगिन झुलको प्रयोग गर्ने, बाहुला छोप्ने गरी लुगा लगाउने, घर वरिपरि पानी जम्न नदिने, किटनाशक औषधिको प्रयोग गर्ने तथा लोशनहरू लगाउने बानीको विकास गर्नुपर्ने डा. सिग्देलको भनाइ छ।
प्रदेश सरकारको स्वास्थ्य मन्त्रालयका अनुसार साउन मसान्तसम्म मात्रै प्रदेश १ मा ८४ जना डेंगुका बिरामी भेटिएका छन्। त्यसयता मन्त्रालयले तथ्यांक अद्यावधिक गरेको छैन।
डेङ्गु रोकथाममा ध्यान दिन सरकारसँग माग
राष्ट्रियसभाको बैठकमा सांसदहरुले मुलुकको विभिन्न क्षेत्रमा डेङ्गु रोगको समस्या बढ्दै गएको जनाउँदै यसको रोकथामका लागि सरकारसँग माग गरेका छन्। बैठकको शून्य समयमा सांसद सुरेश आले मगरले काठमाडौं उपत्यकामा समेत दैनिक डेङ्गु सङ्क्रमण बढ्दो देखिएकाले तत्काल रोकथामको कार्य अघि बढाउन स्वास्थ्य तथा जनसंख्या मन्त्रालयसँग आग्रह गरे।
बैठकमा सांसद उदयबहादुर बोहराले राप्ती राजमार्ग अवस्था कमजोर भएको उल्लेख गर्दै तुलसीपुर –कपुरकोट सडकखण्ड कन्तबिजोग बनेको बताए। सांसद उर्मिला अर्यालले रासायनिक मल अझै राम्ररी आपूर्ति हुन नसक्दा र सिंचाइको अभावका कारण मधेसका किसान चिन्तित रहेको बताइन्।
सांसद तुलप्रसाद विश्वकर्माले भेटेरेनरी चिकित्सकबाहेकका अन्य भेटेरेनरी सेवामा लागेका जनशक्तिलाई समेट्ने भएकाले पशु स्वास्थ्य तथा पशु सेवा विधेयकलाई छिटो पारित गर्न आग्रह गरे।
सांसद नारायणदत्त मिश्रले मलखादको अभाव हुन नदिन सरकारसँग आग्रह गरे।सांसद भुवनबहादुर सुनारले गाउँ–गाउँमा सहकारी घरघरमा भकारी भन्ने नाराका साथ अघि बढेको सहकारी पछिल्लो समयमा बदनाम हुँदै गएकामा चिन्ता प्रकट गरे।
सांसद मदनकुमारी शाहले कैलालीका पथैया, मोहना कान्द्र काँडा र कर्णाली नदीलाई डल्फिन संरक्षित क्षेत्र घोषणा गर्न माग गरिन्। बैठकमा सांसद मोहम्मद खालिदले गत वर्ष सुक्खा मौसमका कारण पीडित किसानका लागि सरकारले घोषणा गरेको राहत सिरहाका किसानले अझै नपाएको गुनासो गरे।
सांसद राजेन्द्रलक्ष्मी गैरेले आगामी निर्वाचनमा महिलालाई उचित प्रतिनिधित्व दिन दलहरूसँग आग्रह गरे।
0 comment