विराटनगर : कोसी व्यारेजको पुलमा बस र ट्रक एक आपसमा ठोक्किँदा ट्रक सप्तकोसीमा खसेको छ ।
पूर्वतर्फ आउँदै गरेको मे १ ख ३००७ नम्बरको ट्रक र पूर्वबाट पश्चिमतर्फ जाँदै गरेको मे १ ख १७६५ नम्बरको बस सुनसरीतर्फ कोसी ब्यारेजको पुलमा बिहान ७ः४० बजेतिर ठोक्किएर दुर्घटना भएको प्रहरीले जनाएको छ ।
सुनसरी प्रहरीका प्रवक्ता डीएसपी राजकुमार राईका अनुसार ट्रक र बस ठोक्किएर दुर्घटना हुँदा कोसी ब्यारेजको १० नम्बर ढोकाको बार भत्किएको छ । बार भत्किएकै ठाउँबाट ट्रक नदीमा खसेको उनले जानकारी उनले दिए । साथै सप्तकोसीमा खसेको ट्रकमा सवार रहेका ३ जनाको सकुशल उद्धार गरिएको राईले जनाकारी दिएका छन् ।
ट्रक चालक २४ वर्षीय दिनेश खत्री सामान्य घाइते भएको र उनलाई उपचारका लागि अस्पाताल पठाइएको छ । उद्धार गरीएका मध्य अन्य २ जनाको स्वास्थ्ये अवस्था सामान्य रहेको डीएसपी राईले बताएका छन् ।
घटनास्थलमा नेपाल तथा सशस्त्र प्रहरी परिचालन गरिएको छ । संयुक्त टोलीले ट्रकको खोजी कार्य जारी रहेको छ । पुलबाट खसेको ट्रकलाई सप्तकोसीले बगाएको अनुमान गरिएको छ । ट्रकलाई बाढीसहितको पानीले छोपेको मात्रै हो कि नदीले बगाइसक्यो भन्ने यकिन हुन बाँकी रहेको र दुर्घटनामा परेर सामान्य क्षति पुगेको बसलाई नजिकै रहेको प्रहरी कार्यालयमा ल्याइएको कोसी प्रदेशका प्रहरी प्रमुख डीआईजी राजेशनाथ बास्तोलाले जानकारी दिएका छन् । बसमा रहेका सबै यात्रुहरु सकुशल रहेको उनले जनाकारी दिएका छन् ।
0 comment