.jpg)
काठमाडौं - क्यालिफोर्नियाका एक व्यक्तिमाथि अमेरिकी राष्ट्रपति डोनाल्ड ट्रम्पको हत्या प्रयास गरेपछि ह्वाइट हाउसको सुरक्षा पुनरावलोकन गराउन बाध्य पारेको छ।
३१ वर्षीय कोल टोमस एलेन सोमबार वाशिङ्टन डीसीको अदालतमा उपस्थित हुँदा उनीमाथि दुई वटा हतियारसम्बन्धी अपराधको पनि आरोप लगाइएको थियो। उनले कुनै निवेदन दिएनन्।
अभियोजकका अनुसार शनिबार ह्वाइट हाउस संवाददाता संघको डिनर कार्यक्रममा उनले सुरक्षा जाँच बिन्दु पार गर्दै जाँदा एक सेमी-अटोमेटिक ह्यान्डगन, एक पम्प-एक्शन सटगन र तीन वटा चक्कु बोकेका थिए।
होटलमा भएको उक्त आक्रमणका क्रममा एक सिक्रेट सर्भिस एजेन्ट गोली लागेर घाइते भए तर गम्भीर अवस्था थिएन। दोषी ठहरिएमा आरोपितले आजीवन कारावासको सजाय पाउन सक्छन्।
नीलो जम्पसुट लगाएका र नामपट्टी (नेमट्याग) भएको अवस्थामा उनी अदालतमा शान्त देखिएका थिए।
उनले धेरैजसो प्रश्नको जवाफ " हो, माननीय न्यायाधीश" वा "होइन, माननीय न्यायाधीश" भन्दै मधुरो स्वरमा दिएका थिए।
उनले आफ्नो उमेर बताएका थिए र आफूले मास्टर्स डिग्री हासिल गरेको बताएका थिए।
तीन जना अमेरिकी मार्शलहरू उनी पछाडि उभिएका थिए र एक जना उनको छेउमै थिए जबकि यस मुद्दा सम्हालिरहेका संघीय अभियोजक, वाशिङ्टनका अमेरिकी अटर्नी जीनिन पिरोले हेरिरहेका थिए।
शनिबार राति भएको उक्त घटनाका क्रममा गोली चलेपछि ट्रम्प, उपराष्ट्रपति जेडी भान्स, मन्त्रिपरिषद्का सदस्यहरू र अन्य ह्वाइट हाउस अधिकारीहरूलाई वाशिङ्टन हिल्टन होटलको बलरुमबाट तत्काल बाहिर निकालिएको थियो।
आरोपितले बेसमेन्टमा रहेको कार्यक्रमस्थलभन्दा एक तल्ला माथिको सुरक्षा जाँच बिन्दु पार गर्दै हतारिँदै गएको बताइएको छ।
"एक जना सिक्रेट सर्भिस अधिकारीको छातीमा गोली लागेको थियो, तर उनले लगाएको बुलेटप्रुफ भेस्टले काम गर्यो," कार्यवाहक महान्यायाधिवक्ता टोड ब्लान्चले सोमबारको पत्रकार सम्मेलनमा भने।
"घाइते भएका यस साहसी अधिकारीले एलेनमाथि पाँच पटक गोली चलाए, तर उनलाई गोली लागेन र उनी भुइँमा लडेपछि तुरुन्तै पक्राउ गरियो।"ब्लान्चका अनुसार आरोपितले कम्तिमा एक पटक आफ्नो सटगन चलाएको विश्वास गरिएको छ।
सिक्रेट सर्भिसका एजेन्टलाई आरोपितले गोली हानेको हो वा अन्य सुरक्षाकर्मीहरूको क्रसफायरमा परेका हुन् भन्ने अझै स्पष्ट भएको छैन। उक्त एजेन्टलाई अस्पतालबाट डिस्चार्ज गरिसकिएको छ।
राष्ट्रपतिको हत्या प्रयासको आरोपमा दोषी ठहरिएमा आजीवन कारावास हुन सक्छ।
अन्य आरोपहरू अपराध गर्न राज्यहरू बीच हतियार ओसारपसार गर्नु र हिंसात्मक अपराधका क्रममा गोली चलाउनु दुवैमा अधिकतम १० वर्षसम्मको सजाय हुन सक्छ। आरोपित बिहीबार पुनः अदालतमा उपस्थित हुने तय गरिएको छ।
अदालतमा सुनुवाइका क्रममा आरोपितले ट्रम्पको हत्या प्रयास गर्नका लागि धेरै राज्यहरू पार गरेको बताइएको थियो।
अधिकारीहरूका अनुसार उनले अप्रिल २१ मा लस एन्जलस क्षेत्रको टोरान्स शहरस्थित आफ्नो घरबाट रेलमार्फत शिकागो यात्रा गरेका थिए।
अप्रिल २४ मा उनले शिकागो छोडेर वाशिङ्टन पुगेका थिए जहाँ उनले गाला कार्यक्रमअघिको दिन हिल्टन होटलमा बसोबास गरेका थिए।
आरोपितले प्रतिष्ठित क्यालिफोर्निया इन्स्टिच्युट अफ टेक्नोलोजीमा अध्ययन गरेका थिए र लस एन्जलस क्षेत्रको पासाडेना युनाइटेड रिफर्म्ड चर्चमा धार्मिक गतिविधिमा सहभागी हुने गरेका थिए।
संघीय चुनावी आर्थिक अभिलेखअनुसार उनले २०२४ मा कमला ह्यारिसलाई राष्ट्रपतिको उम्मेदवारका रूपमा समर्थन गर्दै डेमोक्रेटिक पार्टीसँग सम्बन्धित एक राजनीतिक कार्य समितिलाई २५ डलर चन्दा दिएका थिए।
एक हलफनामाअनुसार आक्रमण हुनुअघि उनले आफ्नो परिवारलाई पठाएको इमेलमा लेखेका थिए, “प्रशासनका अधिकारीहरू... लक्ष्य हुन्, उच्च पदस्थदेखि निम्न पदस्थसम्म प्राथमिकताका आधारमा।”
उनले थपेका थिए, “यदि अत्यावश्यक परेमा लक्ष्यसम्म पुग्न म यहाँ भएका धेरैजसोलाई पार गर्न तयार हुनेछु।”
उनलाई हिरासतमा राखिएको छ र अभियोजकहरूले थप आरोपहरू पनि लगाइने सम्भावना रहेको बताएका छन्।
आरोपितले अनुसन्धानकर्ताहरूसँग सहकार्य गरिरहेका छैनन्।
अमेरिकी अनुसन्धानकर्ताहरूले ट्रम्पविरुद्धको कथित तेस्रो हत्या प्रयासबारे अनुसन्धान गरिरहेका बेला सुरक्षा अधिकारीहरूले राष्ट्रपतिको सुरक्षा प्रोटोकलहरूको समीक्षा गरिरहेका छन्।
वाशिङ्टन हिल्टनमा सुरक्षा घेरा पर्याप्त बलियो थियो कि थिएन कार्यक्रममा सहभागीहरूलाई किन परिचयपत्र देखाउन भनिएन र राष्ट्रपति, उपराष्ट्रपति तथा उत्तराधिकारको क्रममा रहेका अन्य व्यक्तिहरू किन एउटै स्थानमा जम्मा गरिएका थिए भन्नेबारे धेरैले प्रश्न उठाएका छन्।
सोमबारको पत्रकार सम्मेलनमा कार्यवाहक महान्यायाधिवक्ताले कार्यक्रमको सुरक्षा गर्न कानून कार्यान्वयन निकाय असफल नभएको दाबी गरेका छन्।
उनले भने बन्दुकधारी राष्ट्रपति रहेको स्थानभन्दा एक तल्ला टाढा मात्र थियो “राष्ट्रपतिसम्म पुग्नुभन्दा अघि उनका र आक्रमणकारीका बीच सयौं संघीय एजेन्टहरू थिए।”
४५ वर्षअघि जोन हिन्क्ली जुनियरले तत्कालीन राष्ट्रपति रोनाल्ड रेगनको हत्या प्रयास गरेको वाशिङ्टन हिल्टनले सिक्रेट सर्भिसबाट प्राप्त सुरक्षा निर्देशनहरू पालना गरेको जनाएको छ।ह्वाइट हाउसका एक वरिष्ठ अधिकारीले ट्रम्प सिक्रेट सर्भिसको नेतृत्वप्रति “विश्वस्त” छन्।
ह्वाइट हाउसकी प्रमुख कर्मचारी सुसी वाइल्सले यसै साता “ठूला कार्यक्रमहरूका लागि प्रोटोकल र अभ्यासहरूबारे छलफल गर्न” बैठक बोलाउने पनि ती अधिकारीले बताएका छन्।
ट्रम्पले बेलायतका राजा चार्ल्स तृतीय अमेरिकाको चारदिने राजकीय भ्रमणका क्रममा “पूर्ण रूपमा सुरक्षित रहनेछन्” भन्ने आश्वासन दिएका छन्, जसको सुरुवात सोमबार ह्वाइट हाउसबाट भएको थियो।
0 comment