काठमाडौं - कञ्चनपुरको बेदकोट नगरपालिका- ४ बैतोडामा चौधर नदीले कटानी गर्न थालेपछी बस्ती नै जोखिममा पर्न थालेको छ ।
बिहीबारदेखिको निरन्तर वर्षासँगै नदीमा आएको बाढीले दुई दर्जन बढी परिवारको झन्डै तीन बिघा जग्गा कटानी गरी बगरमा परिणत गरेको छ ।
टोलकै ज्ञानज्योति बालविकास केन्द्रको जग्गासमेत कटानी गरेको छ ।
नदी तटीय क्षेत्रमा बसोबास गर्ने धनगिरी ओडले सात कट्ठा जग्गामा लगाइएको धानबाली सहित खेत बगाएको बताउनुभयो ।
बाढीबाट जोगिन आफन्तको शरणमा जानुपर्ने अवस्था सृजना भएको ओडले बताउनुभयो ।
युक्त टोलमा अधिकांश आर्थिक रूपमा विपन्न दलित समुदायका परिवारको बसोबास रहेको छ ।
तटबन्धको प्रबन्ध नहुँदा प्रत्येक वर्ष बाढीले जग्गा कटानी गर्दै आएको छ । यसै वर्षायाममा एक दर्जन बढी परिवारको जग्गा कटान भइसकेको समाजसेवी राजुराम सार्कीले बताउनुभयो ।
तटबन्ध निर्माणका लागि पटकपटक नगरपालिका कार्यालयलाई गुहार्दै आएपनि अहिलेसम्म सुनवाइ हुन नसकेको उहाँले बताउनुभयो।
सार्कीले धेरै परिवारको जग्गा बगेको र बचेको जग्गा पनि बगरमा परिणत भएको गुनासो पोख्नुभयो ।
यसैगरी, कृष्णपुर नगरपालिका- २ बङ्कस्थित बादी समुदायको बस्ती रहेको प्रगति टोलमा पनि वनहरा नदीले कटानी गरिरहेको छ ।
वनहरा विपद् व्यवस्थापन समितिका अध्यक्ष पदम रानाले नदीले धार परिवर्तन गरी बादी बस्तीतर्फ सोझिएर कटानी गर्न थालेको जानकारी दिनुभयो ।
वडाअध्यक्ष अर्जुन साउदले बस्ती जोगाउन तटबन्ध निर्माणका लागि नगरपालिका, प्रदेश र सङ्घीय सरकारको ध्यानाकर्षण गराइने बताउनुभयो ।
उहाँले तटबन्ध निर्माण गर्न वडाको बजेटले धान्न नसक्ने भन्दै अन्य निकायलाई गुहार्नुको विकल्प नभएको बताउनुभयो ।
0 comment