काठमाडौं - कालिकोटको एक विद्यालयमा पढिरहेका ३० विद्यार्थी एकैपटक बेहोस भएका छन्।
कालिकोटको महावै गाउँपालिकास्थित तिला नमुना माध्यमिक विद्यालयमा पढिरहेका ३० विद्यार्थी एकैपटक बेहोस भएका हुन्। विद्यार्थी बेहोस भएपछि एक हप्ताका लागि विद्यालयमा पठनपाठन बन्द गरिएको विद्यालयका शिक्षिक सिता शाहीले बताइन्। उनले भनिन्, 'कक्षा कोठामा पढाउदै थियौँ। गर्मी भइरहेको थियो। सुरुमा एक दुई जना विद्यार्थीमा यो समस्या देखिएपछि स्वास्थ्यकर्मीहरूसँग समन्वय गरियो। लगतै एकपछि अर्को बेहोस भएपछि उपचारका लागि विद्यार्थीलाई अस्पताल पठाइयो।'
यो समस्या अन्य विद्यार्थीहरूलाई समेत हुन सक्ने डरले एक हप्ताका लागि विद्यालय बन्द गरिएको उनको भनाइ छ। अनुमानित १० देखि १४ वर्ष उमेर समूहका विद्यार्थी एक दुई जनाबाट यो समस्या सुरु भएको अस्पतालमा कार्यरत स्वास्थ्यकर्मी टंक चौलगाईंले बताए।
'विद्यालयको खाजामा समस्या भयो की भन्ने डर थियो। तर त्यस्तो देखिएन्। हाम्रो अनुमान गर्मीका कारण बेहोस भएका हुन्। यस्तो रोग एक जनामा देखिएपछि अर्कोले बिरामी देख्दा पनि असर गर्ने भएकाले सबैमा देखिएको हो', उनले भने।
सबै विद्यार्थी उपचारपश्चात डिस्चार्ज भइसकेका छन्। स्वास्थ्य सेवा कार्यालय कालिकोटका जनस्वास्थ्य अधिकृत कटकबहार महतले गर्मीको समयमा हुन सक्ने मास हिस्टेरियाका कारण विद्यार्थीहरू बेहोस भएको हुनसक्ने बताए।
पछिल्लो समय कालिकोटमा गर्मी निकै बढेको छ। गर्मी बढिरहेकाले जिल्लाका अन्य विद्यालयहरूले पनि विद्यार्थीहरूको पठनपाठन र बसाई व्यवस्थापन गरी यो समस्या नआउन उपयुक्त वातावरणमा शैक्षिक क्रियाकलाप गर्नुपर्ने स्वास्थ्यकर्मीहरूले सुझाव दिएका छन्।
0 comment