काठमाडौं - इजिप्टसँग १–१ को बराबरी खेलेपछि इरानले फिफा विश्वकपको नकआउट चरणमा पुग्ने सम्भावना कायम राखेको छ।
खेलको अन्तिम समयमा गरेको विजयी गोल अफसाइडका कारण रद्द भएपछि इरान निर्णायक जितबाट वञ्चित भयो।
अन्तिम ३२ मा स्थान सुरक्षित गरिसकेको इजिप्टले खेल सुरु भएको पाँच मिनेटमै महमुद साबेरको गोलबाट अग्रता लिएको थियो। तर इरानका रामिन रेजाइयानले १४औँ मिनेटमा निकै कठिन कोणबाट गोल गर्दै खेल बराबरीमा ल्याए।
सुरुआतमा रोमाञ्चक बनेको खेल त्यसपछि केही समय अव्यवस्थित र प्रतिस्पर्धात्मक रह्यो। तर अन्तिम क्षणमा खेलले फेरि नाटकीय मोड लियो।
पहिलो हाफमा पेनाल्टी गुमाएका इरानका मेहदी तारेमीले खेलको अन्त्यतिर गरेको हेडर क्रसबारमा लागेर फर्कियो। त्यसलगत्तै इन्जुरी समयमा शोजा खलिलजादेहले गोल गर्दै इरानलाई जित दिलाएको जस्तो देखिएको थियो, जसपछि इरानी बेन्चका खेलाडी र प्रशिक्षकहरू मैदानमा दौडिँदै खुसी मनाउन पुगेका थिए।
तर भिडियो सहायक रेफ्री (VAR) ले समीक्षा गर्दा खलिलजादेह अफसाइड रहेको पुष्टि भएपछि गोल रद्द गरियो र खेल १–१ को बराबरीमा टुंगियो।
यस नतिजासँगै इजिप्ट पाँच अंकसहित गोलअन्तरका आधारमा बेल्जियमपछि समूहको दोस्रो स्थानमा रह्यो। इजिप्टले अब जुलाई ३ मा डलासमा हुने नकआउट चरणमा अस्ट्रेलियासँग प्रतिस्पर्धा गर्नेछ।
इरान भने तीन अंकसहित समूहको तेस्रो स्थानमा रहेको छ। अब उसले उत्कृष्ट तेस्रो स्थानमा रहने आठ टोलीमध्ये एकका रूपमा अन्तिम ३२ मा स्थान बनाउने वा नबनाउने टुंगो अन्य समूहका नतिजापछि मात्र लाग्नेछ।
इरानको अन्तिम क्षणको खुशी निराशामा बदलियो
खेलमा ठूलो संख्यामा इजिप्टका समर्थकहरूको उपस्थिति थियो भने इरानका पनि उल्लेख्य समर्थकहरू थिए। केही इरानी समर्थकहरूले क्रान्ति–पूर्वका झण्डा फहराएका थिए र इरानको राष्ट्रिय गीत (एन्थम)लाई हुटिङ पनि गरेका थिए।
स्थानीय आयोजकहरूले खेललाई “प्राइड म्याच” का रूपमा घोषणा गरेका थिए र रंगीन (रेनबो) झण्डाहरू पनि देखिएका थिए, तर मैदानबाहिर कुनै घटना भने भएन।
इजिप्टले राम्रो संयोजनात्मक आक्रमणमार्फत खेलको पहिलो गोल गरेको थियो। मोहम्मद सलाहको प्रभावशाली चालपछि आएको प्रहार गोलकिपर अलीरेजा बायरानभान्डबाट छुट्दै महमुद साबेरकहाँ पुगेको थियो, जसको कमजोर प्रहार गोलकिपरमाथिबाट गोलभित्र छिरेको थियो।
तर इरान तुरुन्तै खेलमा फर्कियो। मेहदी तारेमीले पेनाल्टी जिते, तर उनको प्रहार इजिप्टका गोलकिपर मोस्तफा शोबेरले उत्कृष्ट रूपमा बचाए। त्यसपछि आएको रिबाउन्डमा रामिन रेजाइयानले गोल गर्दै खेल बराबरीमा ल्याए।
पहिलो हाफको हाइड्रेसन ब्रेकपछि खेलमा स्पष्ट अवसरहरू कम भए। इजिप्ट पहिले नै नकआउट चरणमा पुगिसकेकाले उनीहरू केही सावधानीपूर्वक खेले जसले गर्दा इरानले आत्मविश्वास बढायो।
इन्जुरी टाइममा बक्सभित्र भएको लगातार संघर्षपछि शोजा खलिलजादेहले गोल गर्दै इरानलाई अन्तिम ३२ मा पुग्ने जस्तो देखिएको थियो। तर भिडियो सहायक रेफ्रीले गोल अफसाइड ठहर गर्दै रद्द गर्यो त्यसपछि इरानको नकआउट यात्रा अब उनीहरूको नियन्त्रणभन्दा बाहिर पुगेको छ।
0 comment