काठमाडौं - बंगलादेशकी पहिलो महिला प्रधानमन्त्री खालिदा जियाको ८० वर्षको उमेरमा निधन भएको छ।
सन् १९९१ मा २० वर्षपछि भएको बंगलादेशको पहिलो लोकतान्त्रिक निर्वाचनमा आफ्नो दललाई जित दिलाउँदै जिया देशकी पहिलो महिला सरकार प्रमुख बनेकी थिइन्।
चिकित्सकहरूले सोमबार उनको अवस्था अत्यन्तै गम्भीर रहेको बताएका थिए। उमेर र समग्र कमजोर स्वास्थ्य अवस्थाका कारण एकै समयमा धेरै उपचार दिन सम्भव नभएको उनीहरूले बताएका थिए।
खराब स्वास्थ्य हुँदाहुँदै पनि उनको दलले जिया आगामी फेब्रुअरीमा हुने अपेक्षित आम निर्वाचनमा उम्मेदवार बन्ने बताएको थियो। यो निर्वाचन जियाकी प्रतिद्वन्द्वी शेख हसिनालाई सत्ताच्युत गराउने क्रान्तिपछि हुने पहिलो निर्वाचन हुने थियो।
दशकौँ सम्म बंगलादेशी राजनीति दुई महिलाबीचको कटु प्रतिद्वन्द्विताले परिभाषित भएको थियो, जहाँ उनीहरू पालैपालो सत्ता र प्रतिपक्षमा रहँदै आएका थिए।
“हाम्री प्रिय नेतृ अब हामीसँग रहिनन्। आज बिहान ६ बजे उहाँले हामीलाई छोड्नुभयो,” जियाको दल बंगलादेश नेसनलिस्ट पार्टी (बीएनपी) ले सोमबार फेसबुकमार्फत घोषणा गरेको छ।
खालिदा जिया बंगलादेशका पूर्व राष्ट्रपति जियाउर रहमानकी पत्नीका रूपमा सार्वजनिक रूपमा चिनिन थालिन्। सन् १९८१ मा सैनिक कूका क्रममा रहमानको हत्या भएपछि जिया राजनीतिमा प्रवेश गरिन् र पछि बीएनपीको नेतृत्वमा पुगिन्।
सन् १९९६ मा केही हप्तामात्र चलेको दोस्रो कार्यकालपछि, जिया सन् २००१ मा पुनः प्रधानमन्त्री बनिन् र सन् २००६ को अक्टोबरमा आम निर्वाचनअघि पदबाट हटिन्।
उनको राजनीतिक जीवन भ्रष्टाचार आरोप र अवामी लिगकी नेतृ शेख हसिनासँगको लामो समयदेखिको प्रतिद्वन्द्विताले विवादित रह्यो। हसिना गत वर्ष प्रधानमन्त्री पदबाट हटाइएकी थिइन्।
हसिनाको शासनकालमा सन् २०१८ मा जियालाई भ्रष्टाचार मुद्दामा जेल हालिएको थियो। जियाले आरोप अस्वीकार गर्दै ती राजनीतिक रूपमा प्रेरित भएको बताएकी थिइन्।
गत वर्ष बंगलादेशमा भएको व्यापक सरकारविरोधी आन्दोलनपछि हसिना निर्वासनमा जान बाध्य भएपछि जियालाई जेलबाट रिहा गरिएको थियो। बीएनपीले नोभेम्बरमा जियाले आगामी आम निर्वाचनमा प्रचार गर्ने बताएको थियो।
६० वर्षीय रहमान १७ वर्षको स्व–निर्वासनपछि गत हप्ता मात्र लण्डनबाट बंगलादेश फर्किएका थिए।
जिया पछिल्लो एक महिनादेखि अस्पतालमा भर्ना भएकी थिइन्। जहाँ उनको मिर्गौला क्षति, मुटुरोग र निमोनियालगायतका रोगको उपचार भइरहेको थियो।
उनका अन्तिम दिनहरूमा अन्तरिम नेता मुहम्मद युनुसले जियाका लागि प्रार्थना गर्न देशवासीलाई आह्वान गर्दै उनलाई राष्ट्रका लागि अत्यन्त प्रेरणादायी स्रोत भनेका थिए।
बीएनपीका अनुसार जियाका छोरा रहमान, उनकी पत्नी र छोरीसहित परिवारका सदस्यहरू अन्तिम क्षणमा उनको साथमा थिए।
“हामी उहाँको आत्माको क्षमाको कामना गर्छौं र सबैलाई दिवंगत आत्माका लागि प्रार्थना गर्न अनुरोध गर्दछौं,” पार्टीले मंगलबार जारी गरेको विज्ञप्तिमा भनेको छ।
0 comment