काठमाडौं - फ्रान्सका राष्ट्रपति इमानुएल म्याक्रोनले युक्रेनमा हुने कुनै पनि शान्ति सम्झौता सुरक्षा ग्यारेन्टीका साथ हुनुपर्ने बताएका छन्।
रुस-युक्रेन युद्धबारे ह्वाइट हाउसमा अमेरिकी राष्ट्रपति डोनाल्ड ट्रम्पसँग भेटवार्तापछि सोमबार संयुक्त पत्रकार सम्मेलनमा फ्रान्सेली राष्ट्रपति म्याक्रोनले शान्तिको अर्थ युक्रेनलाई आत्मसमर्पण गराउन नहुने प्रतिक्रिया दिएका हुन्।
ट्रम्पले युक्रेनमा शान्ति सुनिश्चित गर्ने लागत खर्च अमेरिकाले मात्र नभई युरोपेली मुलुकहरूले पनि बेहोर्नुपर्ने बताइरहँदा त्यसको जवाफमा म्याक्रोनले युरोपले सुरक्षा लागतलाई अझ समान रूपमा बाँडफाँड गर्ने आवश्यकता महसुस गरेको बताए।
रुसी आक्रमणको तेस्रो वार्षिकोत्सवमा भएको वार्ताले अगाडि बढ्ने बाटो देखाएको म्याक्रोनको भनाइ छ।
ह्वाइट हाउसमा दोस्रो कार्यकालका लागि ट्रम्पको आगमन गेम चेन्जर भएको म्याक्रोनले बताएका छन् । उनले युद्धमा युद्धविराम र केही हप्ताभित्रै दिगो शान्तिका लागि वार्ता सुरु गर्ने विषयमा कुरा गर्न सम्भव रहेको बताएका छन् ।
म्याक्रोनले आफूले युरोपका अन्य ३० नेता र सहयोगीसँग कुरा गरेको र तीमध्ये धेरै युक्रेनको सुरक्षा प्रत्याभूतिमा सहभागी हुन इच्छुक रहेको बताए । उनले बेलायती प्रधानमन्त्री सर केइर स्टार्मरसँग यस क्षेत्रमा सेना पठाउने प्रस्तावमा काम गरिरहेको बताएका छन् ।
म्याक्रोनले भने फ्रन्ट लाइनमा नजाने, मुठभेडमा नजाने, तर सन्धिले परिभाषित गरेका केही स्थानमा यो शान्ति कायम राख्न र अमेरिकी ब्याकअपसँग हाम्रो सामूहिक विश्वसनीयता कायम राख्न उपस्थितिका रूपमा उपस्थित हुने । युद्ध अन्त्यका लागि भएको वार्तामा सुरक्षा प्रत्याभूति, भूमि र क्षेत्र समेटिने उनले बताए ।
युक्रेनको सार्वभौमिकताप्रति अमेरिकी प्रतिबद्धतालाई सुरक्षित गर्ने सबैभन्दा राम्रो तरिका मध्ये एक महत्वपूर्ण खनिज पदार्थमा सम्झौता गर्नु हो, जुन हाल वासिङ्टन र किभद्वारा वार्ता भइरहेको छ । विश्वव्यापी मञ्चमा वासिङ्टनको स्थानान्तरणको थप सङ्केतको रूपमा संयुक्त राष्ट्र सुरक्षा परिषद्ले द्वन्द्वमा तटस्थ अडान लिएको अमेरिकाले तयार पारेको प्रस्ताव पारित गरेको थियो । यसलाई रुसले समर्थन गरेको थियो तर फ्रान्स र बेलायतले यसमा भाग लिएका थिएनन् । ट्रम्पले आफूले सकेसम्म चाँडो युद्धविराम चाहेको बताएका छन् । यसबारे सहमति भएपछि उनी राष्ट्रपति भ्लादिमिर पुटिनलाई भेट्न रुस जानेछन्।
गत फेब्रुअरी २०२२ मा रुस र युक्रेनबीचको युद्ध सुरु भएको थियो।
0 comment