पार्टीभित्रको फोहोर सफा गर्नुपर्छ : महामन्त्री गगन थापा

काठमाडौं — जिल्ला कार्यसमिति सिन्धुपाल्चोकको कार्यालय बिपी अध्ययन केन्द्र भवनको उद्घाटन तथा नेपाली कांग्रेसका संस्थापक नेता बिपी कोइराला र सिन्धुपाल्चोकका पूर्व सभापतिद्वय स्व रोहिणीराज सिग्देल र स्व विकास लामाको सालिक अनावरण कार्यक्रमलाई सम्बोधन गर्दै प्रतिनिधि सभा सांसद एवं नेपाली कांग्रेसका महामन्त्री गगन थापाले पार्टीभित्र थुप्रिएको फोहोर सफा गर्ने कुरा बताएका छन । 
महामन्त्री थापाले सबै नेता तथा कार्यकर्ताहरूलाई आपसी गुटबन्दीमा समय खर्च नगरी पार्टी सुदृढीकरणमा जुट्न आग्रहसमेत गरेका छन ।  थापाले हरेक गाउँ टोलसम्मै पार्टीभित्र चरम गुटबन्दी रहेको बताउँदै गुटबन्दी अन्त्य नभए कांग्रेस खुम्चिँदै जाने निश्चित छ उनको भनाई थियो ।
महामन्त्री थापाले राज्यले कृषि क्षेत्रमा लगानी बढाउने गरी नीति अघि सार्नुपर्नेमा जोड दिदै वैदेशिक रोजगारीले जीविकोपार्जन मात्रै भइरहेको बताए । कृषि क्षेत्रलाई आधुनिकीकरण नगरी समृद्धी सम्भव नहुने उनको जिकिर थियो ।