काठमाडौं - नेपाली काङ्ग्रेसका नेता कृष्णप्रसाद सिटौलाले जनताको अधिकारलाई बाहिर राखेर लोकतान्त्रिक समाजवादको कल्पना गर्न नसकिने बताउनुभएको छ ।
जननायक विश्वेश्वरप्रसाद कोइरालाको एक सय ११ औँ जन्मजयन्तीका अवसरमा संवाद केन्द्रले आज आयोजना गरेको ‘लोकतान्त्रिक समाजवाद र आजको परिस्थिति’ विषयक अन्तरक्रियामा उहाँले बिपी कोइरालाले भनेजस्तै जनताको शासन सत्तामा प्रत्यक्ष पहुँच भए मात्र लोकतान्त्रिक समाजवादको कल्पना पूरा हुने बताउनुभयो ।
काँग्रेस र कम्युनिस्टबीचको लोकतान्त्रिक समाजवादका बारेमा भिन्दाभिन्दै व्याख्या रहेको उहाँको भनाइ थियो ।
कांग्रेसका पूर्वमहामन्त्री सिटौलाले विसं २०४६ देखि कम्युनिष्टलाई शान्ति र लोकतन्त्रको बाटोमा हिँडाउन कङ्ग्रेसले नेतृत्व गरेको बताउनुभयो ।
उहाँले बिपी कोइराला गतिशील विचार भएको नेता भएको बताउनुभयो ।
कांग्रेस सहमहामन्त्री महालक्ष्मी उपाध्याय ‘डिना’ ले नेपाली कांग्रेसको विधानले बिपी कोइरालालाई स्पष्ट रुपमा चिनेको बताउनुभयो ।
बिपी कोइरालाले दिएको विचार र आदर्शबाट पार्टी अहिले अगाडि बढेको उहाँको भनाइ थियो । नेत्री उपाध्यायले सत्ता बाहिर होस् या सत्तामा होस् कङ्ग्रेसले सधैँ बिपीको विचारलाई अगाडि बढाउनुपर्ने धारणा राख्नुभयो । स्थानीय तह बलियो भए मात्र देशको विकास हुने उहाँको भनाइ थियो ।
वन तथा वातावरण राज्यमन्त्री रूपा विश्वकर्माले बिपी कोइरालाले अगाडि सारेको लोकतान्त्रिक समाजवादको नीतिका कारण संविधानमा हरेक जातजाति र समुदायको प्रतिनिधित्व भएको उल्लेख गर्नुभयो ।
कांग्रेसका केन्द्रीय सदस्य एवं बागमती प्रदेशका आर्थिक मामिलामन्त्री कुन्दनराज काफ्लेले बिपीले देखेको लोकतान्त्रिक समाजवादको सपना कांग्रेसले पूरा गर्दै लगेको बताउनुभयो ।
उहाँले राज्यमा जबसम्म गरिब तथा विपन्न वर्गको उपस्थिति हुँदैन तबसम्म बिपीको सपना पूरा नहुने भएकाले त्यसलाई पूरा गर्न लाग्नुपर्ने उल्लेख गर्नुभयो ।
काँग्रेस कोशी प्रदेशका महामन्त्री एवं कोशी प्रदेशका भौतिक पूर्वाधारमन्त्री भुपेन्द्र राई, काँग्रेस बागलुङका सभापति जीतबहादुर शेरचन लगायतले संविधानले दिएको अधिकार पूरा गर्नसके बिपी कोइरालाले देखेको लोकतान्त्रिक समाजवादको सपना पूरा हुने बताउनुभएको थियो ।
0 comment