काठमाडौं - तनहुँको शुक्लागण्डकी नगरपालिकास्थित जिपी कोइराला राष्ट्रिय श्वासप्रश्वास उपचार केन्द्रमा दश शय्याको डेङ्गी वार्ड स्थापना गरिएको छ । 

डेङ्गी सङ्क्रमणका बिरामीको सङ्ख्या बढेसँगै छुट्टै वार्ड स्थापना गरिएको अस्पतालका कार्यकारी निर्देशक डा रामकुमार श्रेष्ठले जानकारी दिनुभयो ।  हालसम्म अस्पतालमा तीन सय ८५ जनामा डेङ्गी परीक्षण गरिएकामा ९६ जनामा सङ्क्रमण पुष्टि भएको उहाँले बताउनुभयो । डेङ्गी पुष्टि भएकामध्ये २४ जना उपचारपश्चात् घर फर्किसकेको पनि निर्देशक श्रेष्ठले बताउनुभयो ।

अघिल्लो वर्ष तनहुँमा महामारीका रूपमा डेङ्गी फैलिएको थियो । 
 
यसैबीच दमौली अस्पतालमा पनि डेङ्गी परीक्षणका लागि आउने बिरामीको सङ्ख्या बढेको छ । अस्पतालका प्रमुख डा परिर्वतन बरालले दुई सय २३ जना बिरामीको स्वास्थ्य परीक्षण गरिएकोमा २५ जनामा सङ्क्रमण पुष्टि भएको जानकारी दिनुभयो।