काठमाडौं - नेकपा (माओवादी केन्द्र) कोशी प्रदेश सरकारबाट बाहिरिने तयारीमा छ। 

केन्द्रमा सत्ता गठबन्धन परिवर्तन भए पनि माओवादीले भने नेकपा (एमाले)का नेता हिक्मतकुमार कार्की नेतृत्वको प्रदेश सरकार छाडेको थिएन। सरकार नछाडेको भनेर माओवादीको तीव्र आलोचना भइरहेको थियो। नेपाली कांग्रेस र एमालेलगायतका दल सम्मिलित गठबन्धन बनेपछि केन्द्रमा माओवादी प्रतिपक्षमा पुगेको छ। 

केन्द्रीय गठबन्धन अनुसार सरकार निर्माण गर्नुपर्ने दबाब मुख्यमन्त्री कार्कीलाई थियो। कार्की नेतृत्वको सरकारमा माओवादीबाट गणेश उप्रेती भौतिक पूर्वाधार विकास, राजेन्द्र कार्की स्वास्थ्य र नारायणबहादुर मगर पर्यटन, वन तथा वातावरणमन्त्री छन्। बन्दना झागड राज्यमन्त्री छिन्। 

स्रोतका अनुसार माओवादीका मन्त्रीहरु राजीनामा दिनलाई मुख्यमन्त्रीको समय पर्खिएर बसेका छन्। मुख्यमन्त्रीबाट समय पाउनेबित्तिकै राजीनामा दिएर सरकार छाड्ने माओवादीको तयारी छ। 

स्वास्थ्यमन्त्री राजेन्द्र कार्कीले माओवादी अब प्रदेश सरकारबाट बाहिरिने बताए। ‘केन्द्रमा गठबन्धन परिवर्तन भइसकेका कारण प्रदेश सरकारमा माओवादी बसिरहने कुरा हुँदैन,’ उनले भने, ‘सरकार कहिले छाड्नेभन्ने टुंगो चैं छलफलपछि लाग्ने छ।’