काठमाडौं – गोरखाको मनकामनामा जीप दुर्घटना हुँदा ५ जनाको ज्यान गएको छ भने १२ जना घाइते भएका छन् ।

यसरी ज्यान गुमाउनेमा गोरखा शहिद लखन गाउँपालिकाका १९ वर्षीय प्रविण थापा, २८ वर्षीय वीरबहादुर थापा, अन्दाजी १९ वर्षीय  निरज थापा, १९ वर्षीया नविना थापा र ६४ वर्षीय धनबहादुर थापा रहेको प्रहरीले जानकारी दिएको छ ।

दुलहा दुलहीसहित सहिदलखन ३ कोटगाउँबाट १९ जना जन्ती बोकेर सहिदलखन ५ पोखरीडाँडा जाँदै गरेको प्रदेश ३–०१–०२३ च २४२७ नंबरको बोलेरो जीप सहिद लखन गाउँपालिका ३ सिलिङमा शुक्रबार बिहान करिब दुई बजे दुर्घटना भएको हो । 

घाईतेहरु मध्ये, नरबहादुर थापा, दोषबहादुर थापा, होमबहादुर राना, सन्दीपा राना, सुरज थापा, चन्द्र थापा, कुलबहादुर राना, लक्ष्मी थापा, मनिका राना र प्रतीक रानाको आँबुखैरेनीस्थित आँबुखैरेनी अस्पतालमा उपचार भईरहेको छ भने, लालु थापाको चितवन मेडिकल कलेजमा उपचार भइरहेको प्रहरीले जनाएको छ ।