काठमाडौं – धनुषामा एक महिलाको हत्या गरेको आरोपमा एक युवकलाई प्रहरीले पक्राउ गरेको छ । धनुषा मिथिलाबिहारी नगरपालिका ८ तारापट्टीकीका ४२ वर्षीया उषा दासको हत्याको आरोपमा मण्डललाई प्रहरीले पक्राउ गरेको हो ।
यसरी पक्राउ पर्नेमा बारा कलैया नगरपालिका १८ घर भई जनकपुरमा घर बनाउने मिस्त्री २२ वर्षका ओमलाल मण्डल रहेको प्रहरीले जानकारी दिएको छ ।
जिल्ला प्रहरी कार्यालय धनुषाले मण्डललाई चितवनबाट पक्राउ गरी ल्याएर मंगलबार सार्वजनिक गरेको छ ।
उषाको २० जेठमा नै हत्या भएको थियो । २८ जेठको साँझमा प्रहरीले उषाको शव उनकै घर नजिकैको पोखरीको डिलबाट बरामद गरेको थियो । २८ गते साँझ ५ बजे पोखरीको छेउमा जनावरले खोस्रेको देखेपछि शंका लागेर स्थानीय वासिन्दाले प्रहरीलाई खबर गरेका थिए । प्रहरीले उत्खनन गरेपछि उषाका छोरा बुहारीले शव सनाखत गरेका थिए ।
मृतक दासको शवलाई पोस्टमार्टमका लागि प्रादेशिक अस्पताल जनकपुरमा राखिएको छ ।
मण्डललाई हिरासतमा राखेर कर्तव्य ज्यान सम्वन्धी मुद्दामा प्रहरीले अनुसन्धान गरी रहेको धनुषाका प्रहरी प्रमुख प्रहरी उपरीक्षक एसपी विश्वराज खड्काले जानकारी दिएका छन् ।
0 comment