काठमाडौं - नेपाली कांग्रेसका महामन्त्री गगनकुमार थापाले राष्ट्रिय स्वतन्त्र पार्टीका सभापति रवि लामिछानले भावनाको व्यापार गरिरहेको आरोप लगाएका छन्। 

चितवनको कालिका नगरपालिकाको क्लब चोकमा आयोजित चुनावी सभामा बोल्दै उनले परीक्षणको क्रममा पाँच वर्ष खेर जान दिन नहुने भन्दै भावानामा नबग्न जनतालाई आग्रह गरे। ‘चितवन-२ का मतादाता भावनात्मक ब्यापारमा बहकिनुहुन्छ कि तथ्यमा टेकेर निर्णय गर्नुहन्छ। उपनिर्वाचन किन हुँदैछ भनेर कुनै दल नबनी स्वतन्त्र बहस गर्नुस् अनि निर्णय गर्नुहोस् त,' उनले भने। 

महामन्त्री थापाले सरकारमा सहभागी भए पनि प्रश्न गर्न आफू पछि नपर्ने बताए। उनले पार्टी कार्यकर्तालाई आफ्नो उम्मेदवारलाई जिताउन आह्वान गरे। 

'बरु भोटै हाल्दिन भन्न पाइन्छ। तर पार्टीमा बसेर बाहिर बाहिर रुख भन्ने भित्र भोट नहाल्ने काम राम्रो हुँदैन। मनमा हरि छ भने अरुले नदेखेपनि हरिले देख्छन्,' उनले भने, 'पार्टीको नीति र निर्णयको विषयमा तपाईंको प्रश्न होला। त्यसको सके उत्तर दिउँला नसके सँगै लडौंला । तर यो पाँच वर्ष खेर जान दिनु हुँदैन।'

संविधानले नै ब्यवस्था नगरेको दोहोरो नागरिकताको मुद्दामा दलहरूलाई दोष दिएर लामिछानले जनतामा भ्रम छरेको थापाको भनाइ छ।