काठमाडौं - मध्य यमनमा हुथी विद्रोहीहरूले सैन्य शिविरहरूमा गरेको आक्रमणमा परी यमनको सरकारी सेनाका कम्तीमा ३० जना जवानको मृत्यु भएको छ। हालैका वर्षहरूमा यी दुवै पक्षबीच भएको भिडन्तमा यो सबैभन्दा घातक आक्रमणमध्ये एक हो।

यमनको रक्षा मन्त्रालयका अनुसार मारिब र हदरामौत प्रान्तका विभिन्न सैन्य शिविरहरूमा बलिस्टिक मिसाइल र ड्रोन प्रयोग गरी आक्रमण गरिएको थियो। यी आक्रमणहरूमा परी धेरै सैनिकको मृत्यु हुनुका साथै ठूलो सङ्ख्यामा घाइते भएका छन्। यद्यपि, मन्त्रालयले मृतकको सटीक सङ्ख्या भने सार्वजनिक गरेको छैन।

रक्षा मन्त्रालयले यस आक्रमणलाई 'विश्वासघात' को संज्ञा दिँदै यस 'आक्रामक कदम'को उचित समय र स्थानमा कडा जवाफ दिइने बताएको छ।

उत्तर-पश्चिम यमनको ठूलो भू-भागमा नियन्त्रण जमाउँदै आएको इरान समर्थित हुथी विद्रोहीहरूले भने सैन्य अभियानको तयारी गरिरहेका 'ठूला साउदी सैन्य जमावडा' लाई निशाना बनाएको दाबी गरेका छन्। यमनको गृहयुद्धका क्रममा साउदी अरब नेतृत्वको गठबन्धनले सरकारी सेनालाई समर्थन गर्दै आएको छ।

यसैबीच, अर्को एक फरक घटनामा साउदी अरब नेतृत्वको गठबन्धनका प्रवक्ताले साउदीको नज्रान सीमा क्षेत्रमा ११ जना नागरिक घाइते भएको बताएका छन्। उनका अनुसार यो आक्रमण पनि हुथी विद्रोहीहरूले नै गरेका हुन्।

गठबन्धनले सामाजिक सञ्जाल एक्समा जारी गरेको विज्ञप्ति अनुसार घाइते हुनेहरूमा सात जना साउदी नागरिक रहेका छन्, जसमा एक महिला र चार वर्षका बालक पनि सामेल छन्। बाँकी चार जना घाइते नागरिक यमन, पाकिस्तान र मिश्र (इजिप्ट) का बासिन्दा हुन्। यमनको रक्षा मन्त्रालयका अनुसार मध्य यमनमा हुथी विद्रोहीहरूको यो आक्रमण बिहीबार स्थानीय समय अनुसार बिहान १०:४० बजे भएको थियो।