काठमाडौं - अमेरिकी राष्ट्रपति डोनाल्ड ट्रम्पले अमेरिकामा जन्मिने सबै व्यक्तिलाई स्वतः नागरिकता दिने जन्मसिद्ध नागरिकता अन्त्य गर्ने आफ्नो कार्यकारी आदेशलाई खारेज गरेको हालैको मुद्दामा पुनः सुनुवाइका लागि संयुक्त राज्य अमेरिकाको सर्वोच्च अदालतसमक्ष अनुरोध गर्ने योजना रहेको बताएका छन्।
गत महिना सर्वोच्च अदालतले जन्मसिद्ध नागरिकता सीमित गर्ने ट्रम्पको प्रयास अस्वीकार गरेको थियो। तर बुधबार ट्रम्पले उक्त मुद्दाको पुनः सुनुवाइ माग गर्ने बताएका हुन्।
ट्रम्पले आफ्नो सामाजिक सञ्जाल प्लेटफर्म सोसल ट्रुथमा लेख्दै भने, “अमेरिकी नागरिकता बिक्रीका लागि होइन! वास्तवमा त्यसो गर्नु अपराध हो, त्यसैले सर्वोच्च अदालतको निर्णय गलत छ। म तुरुन्तै संयुक्त राज्य अमेरिकाको सर्वोच्च अदालतमा पुनः सुनुवाइको माग गर्नेछु।”
६–३ को बहुमतबाट आएको सर्वोच्च अदालतको निर्णय ट्रम्पका लागि ठूलो झट्का मानिएको छ। यो निर्णयले उनको आप्रवासन नीतिमा व्यापक परिवर्तन ल्याउने प्रयासलाई पनि ठूलो धक्का दिएको छ।
सन् २०२५ जनवरी २० मा पदभार ग्रहण गरेलगत्तै ट्रम्पले एक कार्यकारी आदेशमा हस्ताक्षर गर्दै अस्थायी कानुनी हैसियत भएका वा कागजातविहीन आमाबाबुबाट अमेरिकामा जन्मिएका बालबालिकालाई स्वतः अमेरिकी नागरिकता नदिने व्यवस्था गर्न खोजेका थिए।
ट्रम्पले अदालतको पछिल्लो निर्णयलाई “देशका लागि दुर्भाग्यपूर्ण” भन्दै जन्मसिद्ध नागरिकता सीमित गर्ने कानुन पारित गर्न अमेरिकी कांग्रेसका रिपब्लिकन सांसदहरूलाई आह्वान गरेका छन्। तर यस्तो कानुन पारित गराउन उनलाई कठिन हुने देखिन्छ, किनभने अधिकांश जनमत सर्वेक्षणहरूले जन्मसिद्ध नागरिकताको पक्षमा बलियो जनसमर्थन रहेको देखाएका छन्। साथै, सर्वोच्च अदालतको बहुमतको रायले यस्तो परिवर्तनका लागि सम्भवतः अमेरिकी संविधानमै संशोधन आवश्यक पर्ने संकेत गरेको छ।
ट्रम्पले पुनः सुनुवाइको अनुमति पाउने सम्भावना भने निकै कम देखिन्छ। सर्वोच्च अदालतले मुद्दाको पुनः सुनुवाइका मागहरू विरलै स्वीकार गर्ने गर्छ, र कुनै मुद्दामा फैसला सुनाइसकेपछि पुनः सुनुवाइको अनुमति दिएको धेरै दशक भइसकेको छ।
0 comment