काठमाडौं - सर्लाहीको ईश्वरपुर नगरपालिका- २, भक्तिपुर मियाँखोरमा आज विहान पोखरीमा कार खस्दा दुई जना बेपत्ता भएका छन् ।
मियाँखोरस्थित सडक छेउमा रहेको सरस्वती माध्यमिक विद्यालयको पोखरीमा बयलवासबाट महोत्तरीको गौशालातर्फ गइरहेको लु २ च ६७५८ नम्बरको कार अनियन्त्रित भई खस्दा कार चालक गौशाला नगरपालिका- २, महोत्तरीका ३७ वर्षीय सुरेश महतो र कारमा सवार सोनमा गाउँपालिका- ८, महोत्तरीका ३७ वर्षीय रामाकान्त ठाकुर बेपत्ता भएका हुन् ।
कारमा सवार गौशाला नगरपालिका- २, का ३१ वर्षीय जनक यादव भने सकुशल बाहिर निस्कन सफल भएको प्रहरीले जनाएको छ ।
कारसहित पोखरीमा डुबेर बेपत्ता दुई जनाको नेपाल प्रहरी र सशस्त्र प्रहरीको टोलीले खोजी गरिरहेको छ ।
महोत्तरीको बर्दिबासस्थित सशस्त्र प्रहरी बलको छिन्नमस्ता बाहिनीबाट गोताखोरको टोली समेत घटनास्थलमा पुगेको छ ।
ईश्वरपुर नगरपालिका २ का वडाध्यक्ष सुरेन्द्र कार्कीले आज बिहान २ देखि ३ बजेको आसपासमा कार दुर्घटना भएको हुनसक्ने बताउनुभयो ।
0 comment