काठमाडौं - काठमाडौं उपत्यकासहित देशका धेरै ठाउँमा निरन्तर भारी बर्षा भईरहेकाले मौसम पूर्वानुमान महाशाखाले सतर्क रहन अनुरोध गरेको छ।

उपत्यकाभित्र भक्तपुरको हनुमन्ते खोला र ललितपुरको खोड्कु खोलामा पानीले सतर्कता तह पार गरेको छ। गए रातीदेखी काठमाडौंसहित गण्डकी र लुम्बिनी प्रदेशका विभिन्न ठाउँमा भारी बर्षा भईरहेको छ।

जलसतह बढ्दो क्रममा रहेको तथा नदी तटीय क्षेत्रमा बाढीको जोखिम रहेकाले उच्च सतर्कता अपनाउन भन्दै महाशाखाले एसएमएस अलर्ट नै जारी गरेको हो। थप वर्षा हुन सक्ने सम्भावना रहेकोले उपत्यकाका नदी किनार छेउछाउ बसोबास गर्ने र नदी किनारको सडकबाट यात्रा गर्नेलाई उच्च सतर्कता अपनाउन महाशाखाले अनुरोध गरेको छ।

पछिल्लो समयमा अर्घाखाचीँको सन्धिखर्क, गुल्मीको बडिगाड, स्याङजाको मालुङ्गा बर्षा मापन केन्द्रमा भारी वर्षा भएको छ। यसैगरी, तिनाउ नदी, पश्चिम राप्ती, डुम्रे खोला, बडिगाड, बबई लगायत अन्य नदीहरूमा आकस्मिक बाढीको जोखिम रहेको विभागले जनाएको छ। पाल्पा जिल्लाको कुमलगाउँ, गण्डाकोट, जल्पा, अर्चले, बल्ड्याङ्गढी र आसपास मध्यम-भारी वर्षा मापन रहेको उल्लेख छ।

मौसम विभागका अनुसार देशभर अधिकांश स्थानहरूका मेघ गर्जनसहित मध्यम वर्षाको सम्भावना रहेको छ। कोशी, बागमती, गण्डकी, लुम्बिनी, कर्णाली, मधेश र सुदुरपश्चिम प्रदेशका थोरै स्थानहरूमा भारी वर्षाको सम्भावना रहेको छ।  

गण्डकी, लुम्बिनी, कर्णाली र सुदुरपश्चिम प्रदेशको एक-दुई स्थानमा अति भारी वर्षाको सम्भावना रहेको मौसम पूर्वानुमान महाशाखाले जनाएको छ।