काठमाडौं - अमेरिकी डलर साटिदिने भन्दै लाखौं रकम लुटपाट गरेको आरोपमा प्रहरीले तीनजनालाई पक्राउ गरेको छ।

पक्राउ पर्नेहरुमा सिन्धुपाल्चोक बाह्रबिसेका सुकलाल पाइन, इनकुमार पाख्रिन र सूर्यबहादुर पाइन रहेका छन्।

अमेरिकी डलर साट्ने प्रलोभन देखाएर उनीहरूले काठमाडौंको चोभारबाट १८ लाख, ललितपुरको इमाडोलबाट १० लाख र ललितपुरको हरिसिद्धिबाट १८ लाख रुपैयाँ लुटपाट गरेको उपत्यका अपराध अनुसन्धान कार्यालयका प्रहरी उपरीक्षक रबिन्द्र रेग्मीले बताउनु भयो ।

उनीहरूलाई ललितपुरको ढुंगेली बसपार्कबाट पक्राउ गरेको प्रहरीले बताएको छ ।

पक्राउ परेका सुकलाल पाइन यसअघि २०७६ सालमा डाँकाचोरी कसुरमा पक्राउ परेर मुद्दा चलेका व्यक्ति रहेको प्रहरी उपरीक्षक रेग्मीले बताउनु भयो । 

पक्राउ परेकाहरूमाथि अनुसन्धानका लागि उपत्यका अपराध अनुसन्धान कार्यालयले प्रहरी वृत्त, सातदोबाटोमा पठाएको छ।