काठमाडौं – पर्साको पोखरियामा चितुवाको आक्रमणबाट एक प्रहरी सहित तीन जना घाइते भएका छन् । घाइतेमध्ये एक जनाको स्वास्थ्य अवस्था गम्भीर रहेको छ ।
चितुवाको आक्रमणबाट घाईते हुनेमा पोखरिया नगरपालिका–५ सतवरियाका जोगिन्द्र साह तेली, वडा नम्बर ४ का दिल महम्मद मियाँ र इलाका प्रहरी कार्यालय पोखरियामा कार्यरत प्रहरी जवान सुचिन्द्र प्रसाद यादव घाइते भएका छन् ।
मंगलबार मध्यराति जंगलबाट गँहु बारी हुँदै गाउँमा छिरेको चितुवाले स्थानीयलाई आक्रमण गरी घाइते बनाउन थालेपछि उक्त चितुवालाई नियन्त्रणमा लिन खटिएका प्रहरीे टोलीका जवान यादव आक्रमणमा परेका हुन् ।
गम्भीर घाइते मियाँको पोखरिया अस्पतालमा प्राथमिक उपचार गरी थप उपचारका लागि वीरगन्ज पठाइएको इलाका प्रहरी कार्यालय पोखरियाले जनाएको छ । अरू दुई जना घाइतेको भने पोखरिया अस्पतालमै उपचार भइरहेको छ ।
चितुवा अहिले पनि गाउँकै एक गोठमा लुकेर बसेको हुँदा डिभिजन वन कार्यालयको टोली पुगेर चितुवालाई नियन्त्रणमा ल्याउने प्रयास गरिरहेको एक स्थानीयले जानकारी दिएका छन् ।
0 comment