काठमाडौं – दैलेखमा ग्यास सिलिण्डर बोकेको ट्रक दुर्घटना हुँदा चालकसहित तीनजनाको घटनास्थलमै मृत्यु भएको छ ।
दैलेखका डीएसपी किशोर लम्साल अनुसार मृत्यु हुनेमा अन्दाजी ३१ वर्षीय चालक कृष्ण चौधरी, कामदार २६ वर्षीय लक्षिराम चौधरी र २३ वर्षीय विष्णु चौधरी रहेका छन् । दुर्घटनामा सहचालक प्रकाश कुमाई घाइते भएका छन् ।
ट्रक सडकबाट झण्डै १५० मिटर तल खसेको छ । मनकामना ग्यास सिलिण्डर लिएर नेपालगञ्जबाट दैलेखतर्फ आउँदै गरेको भे १ क २२०१ नम्बरको ट्रक दैलेख सुर्खेत सडक खण्ड अन्तर्गत गुराँस गाउँपालिका–४ तालपोखरीमा ट्रक दुर्घटनामा परेको हो ।
ट्रक दुर्घटनाको कारण खुल्न सकेको छैन् । दुर्घटनाबारे अनुसन्धान भइरहेको प्रहरीले जनाएको छ ।
0 comment