काठमाडौं - गोरखा बजारमा सोमबार दिउँसो भएको मिनीट्रक दुर्घटनामा एकजनाको मृत्यु भएको छ भने ७ जना घाइते भएका छन्। 

गोरखा अस्पतालमा उपचारको क्रममा एकजनाको मृत्यु भएको जिल्ला प्रहरी कार्यालय गोरखाले जनाएको हो । दुर्घटनामा गम्भीर घाइते भएका बर्दिया घर भएका मंगल चौधरी, दोलखा घर भई हाल राष्ट्रिय वाणिज्य बैंक गोरखा शाखामा कार्यरत विष्णु खड्का, ठेगाना नखुलेका बुद्धि नेपालीलाई थप उपचारका लागि भरतपुर अस्पताल पठाइएको प्रहरीले जनाएको छ ।

अन्य घाइतेहरुमा सहिदलखन गाउँपालिका-७ की रमला रानामगर र लालबहादुर गुरुङ, गोरखा नगरपालिका १० छेपेटारकी सावित्री बिक, सहिद लखनकै नारायण भुजेल रहेका छन् । उनीहरुको गोरखा अस्पतालमा नै उपचार भइरहेको छ ।

प्रदेश नं ३ ०१–००३–६१७० नम्बरको मिनीट्रक गोरखा बजारको बिसौनी मोडबाट पल्टेर जिल्ला ट्राफिक प्रहरी कार्यालयसम्म पुगेको थियो । आरुघाटबाट तरकारी लगायतका सामान लिन मिनीट्रक धनी उमेश श्रेष्ठ गोरखा बजार आएका थिए । उनी आफैँले चलाएको सो ट्रक दुर्घटना भएको थियो । ब्रेक फेल भएर दुर्घटना भएको हुनसक्ने प्रारम्भिक अनुमान छ।