काठमाडौं - नेपाल पत्रकार महासंघले प्रेस काउन्सिल ऐन, २०४८ संशोधन गर्न बनेको अध्यादेश जारी नगर्न राष्ट्रपति रामचन्द्र पौडेलसमक्ष आग्रह गरेको छ। अध्यादेशका प्रावधानले प्रेस तथा अभिव्यक्ति स्वतन्त्रतामा असर पार्न सक्ने भन्दै महासंघले त्यसलाई रोक्न राष्ट्रपतिको ध्यानाकर्षण गराएको हो।

महासंघका अध्यक्ष निर्मला शर्माको नेतृत्वमा पदाधिकारी, सल्लाहकार तथा केन्द्रीय सदस्यसहितको टोलीले बिहीबार राष्ट्रपति पौडेललाई भेटेर अध्यादेशबारे आफ्नो धारणा राखेको थियो।

महासंघले सरोकारवाला पक्षसँग पर्याप्त छलफल र परामर्श नगरी संसद्लाई छलेर अध्यादेशमार्फत कानुन ल्याउनु लोकतान्त्रिक विधि र प्रक्रियाविपरीत हुने जनाएको छ। प्रेस तथा अभिव्यक्ति स्वतन्त्रतासँग प्रत्यक्ष सरोकार राख्ने कानुन निर्माण गर्दा नियमित विधायिकी प्रक्रिया अपनाउनुपर्ने महासंघको माग छ।

महासचिव रामप्रसाद दहालद्वारा हस्ताक्षरित विज्ञप्तिमा प्रेस स्वतन्त्रतासँग सम्बन्धित कानुन निर्माण गर्दा सम्बन्धित पक्षसँग पर्याप्त छलफल र परामर्श गर्नुपर्ने उल्लेख गरिएको छ।

त्यस्तै, पछिल्लो समय समाचार कक्षमै प्रवेश गरेर प्रहरीले पत्रकारमाथि धरपकड गरेको घटनाको स्वतन्त्र छानबिन गरी दोषीलाई कारबाही नगर्दै सरकारले अध्यादेश ल्याएको भन्दै महासंघले आपत्ति जनाएको छ। यस्तो अवस्थामा अध्यादेश ल्याइनुले प्रेस तथा अभिव्यक्ति स्वतन्त्रता थप प्रभावित हुने महासंघको ठहर छ।