काठमाडौं - गायक प्रमोद खरेलले आफूले पाउने पारिश्रमिक धनकुटा महोत्सवमा घाइतेहरूका लागि खर्च गर्ने जानकारी दिएका छन्।
शनिबार राति भएको घटनाका बारेमा जानकारी दिनका लागि आयोजक संस्था उद्योग वाणिज्य संघ धनकुटाले आयोजना गरेको पत्रकार सम्मेलनमार्फत खरेलले उक्त जानकारी दिएका हुन्।
रकमका विषयमा खरेलले नबताए पनि घटनाप्रति दुःख प्रकट गर्दै कन्सर्टका लागि तोकिएको आफ्नो पारिश्रमिक घाइतेहरूका उपचारमा खर्च गर्ने जानकारी दिए।
शनिबार राति धनकुटा महोत्सवस्थलको प्रवेशद्वार गेटमा भएको अत्यधिक भीडमा ठेलमठेल हुँदा कन्सर्ट हेर्न गएका ३० जना घाइते भएका थिए। उक्त घटनापछि स्थानीय प्रशासनले महोत्सवको सबै कार्यक्रम स्थगित गरेको थियो। घाइतेहरूको धरान र विराटनगरमा उपचार भइरहेको छ।
घाइतेहरूको उपचारका लागि हाल भूमि व्यवस्था तथा सहकारी गरिबी निवारणमन्त्री राजेन्द्रकुमार राईको पहलमा भइरहेको र थप सबै उपचार रकम आयोजकले बेहोर्ने संघका अध्यक्ष विजय सन्तोषी राईले जानकारी दिए।
घटनापछि आजदेखि राति हुने सबै कार्यक्रम स्थगित गरेर दिउँसो ५ बजेसम्म मात्र सञ्चालन गरिने महोत्सवको भोलि समापन गरिने राईले जानकारी दिए।
0 comment