रोटरी अभियानमा संलग्नता र प्रवेश किन ?

सर्वप्रथम यहि फाल्गुन ३ गते शनिवार शिवपुरीमा बसेको रोटरी क्लब अफ डिल्लीबजार काठमाडौंको बोर्ड बैठकले मेरो रोटरी सदस्यतालाई स्वीकृत गरेकोले सबै रोटरीयन पदाधिकारी एवं सदस्य ज्यूहरुलाई आभारसहित धन्यवाद दिन चाहन्छु ।
रोटरीले मानव चरित्रको विकास गरी विचार तथा आत्माको उच्चतम प्रस्फुटन गर्दछ । यसले हामीलाई मानवीय मूल्य मान्यता तथा साँस्कृतिक चेतनाको माध्यमद्वारा व्यक्तिहरूमा सीपको विकास गराई सेवा भावनाको इच्छा तथा क्षमताको विकास गराउँदछ । रोटरीले संसारको उत्थान तथा शान्तिको समझदारीका निमित्त अति उपयुक्त वातावरणको सृजना गर्दछ । अहिले पनि संसारमा त्यस्ता लाखौं पुरुष तथा महिलाहरू छन् जसको मनमुटुमा रोटरियनको भावना लुकेको छ तर रोटरियन बन्न सकिरहेका छैनन् । त्यसको एउटा मात्र कारण यो हो की तिनीहरूलाई रोटरियन बन्न आग्रह गरेको छैन । रोटरी क्लब र रोटरियनहरूको आवश्यकता र महत्व पहिले भन्दा झन् बढी भएको छ ।

रोटरीमा किन संलग्न र प्रवेश गर्ने भन्ने विषयमा निम्नानुसारका सान्दर्भिक कारणहरू रहेका छन् ।

१) अहिलेको यस जटिल बन्दै गइरहेको संसारमा रोटरीले मानिसको एक महत्वपूर्ण आधारभूत आवश्यकता पूरा गर्दछ त्यो होः साथीभाइको र मित्रता आदान प्रदान को आवश्यकता ।

२) रोटरीले प्रत्येक व्यवसाय समुदायहरूको बीचमा आपसी समन्वय कायम गर्दछ ।

३) रोटरीको सदस्यताले व्यक्तिगत सम्बन्धहरूमा वृद्धि गर्दै व्यक्तित्व विकासमा टेवा पुर्‍याउँदछ ।

४) रोटरी एक नेतृत्व गर्ने व्यक्तिहरू तथा सफल व्यक्तिहरूको संगठन हो । अरुको सेवा गर्दै नेतृत्वको विकास गर्न रोटरीको लागि विश्वविद्यालयको शिक्षा जस्तै हो ।

५) सामान्यतया रोटरी क्लबले समुदायका असल तथा सक्रिय नागरिकलाई समेटेको हुन्छ । तसर्थ यसले असल नागरिकको विकास गर्दछ ।

६) समुदाय, राष्ट्र तथा अन्तर्राष्ट्रिय स्तरमा के भइरहेछ भन्ने बारेमा सबैलाई सुसूचित गराउनको निमित्त रोटरीमा प्रत्येक हप्ता एक कार्यक्रमको आयोजना गरिन्छ । जसले सूचनामूलक शिक्षाको विकासमा निरन्तरता दिएको हुन्छ ।

७) रोटरीले मानिसहरूको जमानमा बोल्ने सीपको साथै आत्मविश्वासको विकास गर्दछ ।

८) संसारमा रोटरी क्लब नभएका ठाउँहरू अत्यन्त कम छन् । यसको अर्थ रोटरीले संसारभरिका मानिससँग मित्रताको विकास गर्न मद्दत गर्दछ ।

९) नयाँ ठाउँमा यात्रा गरिरहेको एक रोटरियनले रोटरी संजालको माध्यमद्वारा एक डाक्टरलाई, वकिललाई तथा पेशाकर्मीलाई छिटो र सजिलोसँग भेटन सक्दछ र आवश्यक सहयोग पाउन सक्दछ ।

१०) रोटरीले समय समयमा भेला, सम्मेलन तथा गोष्ठी आयोजना गर्दछ जसले रोटरीहरूमा ज्ञानवद्र्धक, शिक्षामूलक तथा सूचनामूलक मनोरञ्जन प्रदान गर्दछ ।

११) प्रत्येक हप्ता गरिने भेला तथा बैठकले सदस्यहरूलाई विभिन्न खालका सकारात्मक सामाजिक व्यवहार अथवा सीपको विकास गर्ने अवसर प्रदान गर्दछ ।

१२) रोटरीले संसारकै सबभन्दा ठूलो आदानप्रदान कार्यक्रम सञ्चालन तथा आयोजना गर्दछ । जसअन्तर्गत माध्यमिक तहका विद्यार्थीको लागि कार्यक्रम, क्याम्पसका विद्यार्थीको लागि कार्यक्रम, दम्पतिका लागि विभिन्न अवसर तथा विभिन्न प्रकारका पारिवारिक कार्यक्रम रहेका हुन्छन् जसले सदस्यहरूमा मूल्य मान्यताको विकास गर्न टेवा पुर्‍याउँदछ ।

१३) प्रत्येक रोटरीमा रोटरियनले अपनाउँदै आएको व्यवसायलाई बढवा दिने खालका सीपहरूको विकास गर्ने अपेक्षा गरिएको हुन्छ ।

१४) रोटरीले चार तरिकाले परीक्षण (Four Way Test) को अभ्यासद्वारा कुनै पनि सदस्यको मूल्यमान्यताको उच्च तहसम्म विकासमा सहयोग पुर्‍याउँदछ । जसले   रोटरियनलाई आफ्नो व्यवसाय र व्यक्तिगत सम्बन्धमा नैतिकताको विकास गर्नमा सघाउ पुर्‍याउँदछ ।

१५) रोटरीमा प्रत्येक भाषा, सँस्कृति, जात, जाति, धर्म, समूह, राजनीतिक समूह इत्यादिको संलग्नता पाइने हुँदा यसले अवश्य पनि साँस्कृतिक चेतनाको विकासमा सहयोग पुर्‍याउँदछ ।

१६) रोटरी संसारकै सबभन्दा पुरानो र प्रतिष्ठत क्लब हो । यसमा  कार्यकारिणीहरू, व्यवस्थापकहरू तथा अन्य पेशागत व्यक्तिहरू संलग्न हुन्छन् जसले प्रभावकारी नीति बनाउन र निर्णय गर्न सक्छन् ।

१७) जे सुकै भएतापनि रोटरीमा आवद्ध मानिसहरू असल मानिस हुन्छन् । महत्वपूर्ण हुनु राम्रो कुरा हो र राम्रो हुनु अझ महत्वपूर्ण कुरा हो भन्ने मान्यतामा विश्वास गर्ने मानिस रोटरीमा आवद्ध छन् ।

१८) रोटरीमा कुनै त्यस्तो फरकखालको गोप्य प्रकारको नीति छैन । न त यसमा हामी यस्तो, उस्तो अरुभन्दा फरक भन्ने साँघुरो सोचाइ नै छ । यो त एउटा पुरुष र महिलाको खुला तथा स्वतन्त्र समाज हो जसमा केवल अरुलाई सेवा प्रदान गर्नु पर्छ भन्ने कुरामा विश्वास गरिन्छ ।

१९) रोटरी एक सेवामुखी क्लब हो । यसको मुख्य ध्येय मानिसहरुलाई प्रदान गरिने सेवा हो । त्यसैले सायद रोटरीहरूले प्राप्त गर्ने सर्वोत्तम अवसर भनेको अरुलाई सेवा गर्ने मौका प्राप्त गर्नु हो ।

२०) रोटरी विभिन्न पेशा र व्यवसाय नेतृत्व गर्नेको समूह हो । त्यसकारण यसको बैठक र कार्यक्रममा समयको महत्वलाई विशेष प्राथमिकता दिने गरिन्छ ।