काठमाण्डौं – कुनैबेला स्टेज कार्यक्रममा निकै व्यस्त देखिने गायिका समीक्षा अधिकारी पछिल्लो समय आफ्नो गायन क्षेत्रमा सहभागिता जनाउन पाएकी छैनन । 

सांगीतिक करिअरमा अघिल्लो वर्षबाट लगभग ब्रेक लागेको थियो । लामो समय सामाजिक सञ्जालबाट पनि विश्राम लिएकी समीक्षालाई करिअरमा पिकअप लिन भने निकै गाह्रो    भइरहेको छ । बल्ल, बल्ल पाएका स्टेज शोमा पनि विरोध गर्नेहरुका कारण जान सक्ने अवस्था सिर्जना भइसकेको छैन । 

तर गीत रेकर्डिङमा भने समीक्षा फर्किएकी छन् । उनको सांगीतिक करिअर बिस्तारै लयमा फर्किंदै गएको छ । हरेक दिन नयाँ गीत रेकर्ड गरिरहेकी छन् । उनका नयाँ गीत युट्युबमा रिलिज हुने क्रम पनि बढेको छ । पछिल्ला केही दिनमा उनका चार गीत रिलिज भइसकेका छन् । 

गीतकार राजेन्द्र थापाको शब्दमा समीक्षाले स्वर दिएको ‘यस्तो नहोस् कसैलाई बोलको गीत केही दिनअघि रिलिज भयो । थापाले उक्त गीत समीक्षाका लागि नै लेखिएको बताएका छन् । गीत गाउँदै गर्दा समीक्षा रोएको आवाज भिडिओमै राखेर सार्वजनिक गरियो साथै उक्त गीतले निकै चर्चा पनि पाएको थियो ।  

त्यसयता उनको स्वरमा भो कुरै नगर, दर्पण छायाँमा, निभेको चुलो, लगायत गीत सार्वजनिक भए । समीक्षा गायनसँगै सामाजिक सञ्जालमा पनि सक्रिय हुन थालेकी छन् । गायिका समीक्षा अधिकारी बिस्तारै गायनमा पहिलेकै सक्रियता फर्काउने कसरतमा छिन् ।