काठमाडौं - कर्णाली प्रदेशमा नेकपा र नेपाली कांग्रेसको गठबन्धनमा वाइडबडी प्रकरण मुछिएका कांग्रेस संसदिय दलका नेता जीवनबहादुर शाहीलाई मुख्यमन्त्री बनाउने सहमति भएको छ। नेकपा प्रदेश सभाका प्रमुख सचेतक कृष्णबहादुर जीसीले नेकपा र नेपाली कांग्रेसबीच नयाँ सत्ता गठबन्धनमा नेपाली कांग्रेसका संसदिय दलका नेता जीवनबहादुर शाहीलाई मुख्यमन्त्री बनाउने सहमति भएको बताए।

अख्तियार दुरुपयोग अनुसन्धान आयोगले वाइडबडी विमान खरिदमा भ्रष्टाचार गरेको भन्दै तत्कालीन पर्यटनमन्त्री जीवनबहादुर शाही सहित ३२ जनाविरुद्ध २०८० चैत २२ गते भ्रष्टाचार मुद्दा दायर गरेको थियो। वाइडबडी जहाज खरिद प्रकरणमा १ अर्ब ४७ करोड रुपैयाँ भ्रष्टाचार भएको अख्तियारको ठहर थियो। वाइडबडी भ्रष्टाचार प्रकरणमा भ्रष्टाचार मुद्दा चलाइएका प्रतिवादी एवं जीवनबहादुर शाहीले बैंक जमानत/सुरक्षण बिना नै प्रतिबद्धता शुल्क दिने मन्त्रीस्तरीय निर्णय गरेका थिए। 

उनी तत्कालीन संस्कृति, पर्यटन तथा नागरिक उड्डयनमन्त्री शाहीले विमान खरिद कार्य प्रचलित सार्वजनिक खरिद ऐन, २०६३ र सो अन्तर्गत बनेको सार्वजनिक खरिद नियमावली, २०६४ विपरीत रहेको तथ्यलाई अनदेखा गरी नेपाल वायुसेवा निगमलाई गैरकानूनी हानी पुर्‍याउने कार्य गरेको अख्तियार दुरुपयोग अनुसन्धान आयोगले दाबी थियो। उनले बदनियतसाथ सम्झौता पत्रमा कानुन विपरीतको मूल्यवृद्धिको सर्त र विमानको प्रमुख प्राविधिक विशिष्टता भारवहन क्षमतालाई बदर गराउनुपर्ने वा सच्याउनु पर्नेमा उल्टै मन्त्रीस्तरीय निर्णय गरेर वैधानिकता दिएको आयोगले विशेष अदालतमा दायर गरेको अभियोग पत्रमा उल्लेख छ।

भारवहन क्षमता २४२ टन बाट २३० टनमा कायम गर्ने तर भुक्तानी भने २४२ टनकै गर्नेगरी राखेका प्रावधानलाई अनादेखा गरी तत्कालीन मन्त्री शाहीले प्रस्तावदाता र निगमका कर्मचारी/पदाधिकारीसँगको मिलेमतोमा आपूर्तिकर्तालाई अमेरिकी डलर एक करोड ३३ लाख ८८ हजार एक सय नौ रुपैयाँ ६० पैसा अर्थात एक अर्ब ४७ करोड १० लाख ५ हजार चार सय २ रुपैयाँ ५ पैसा बढी भुक्तानी गरेको अभियोग थियो। तर विशेष अदालतले उनलाई २०१ मंसिर २० गते सफाइ दियो। तर विशेष अदालतको सफाइको फैसलाविरुद्ध अख्तियार दुरुपयोग अनुसन्धान आयोगले २०८२ साल मंसिर १६ गते सर्वोच्च अदालतमा पुनरावेदन गरेको छ। उक्त मुद्दा अहिले पनि सर्वोच्चमा विचाराधीन छ।

अहिले पनि अख्तियारको अनुसन्धानमा छन् शाही

कर्णाली प्रदेशका पूर्वमुख्यमन्त्री समेत रहेका शाही अहिले पनि अख्तियारकोे अनुसन्धानमा छन्। उनले कर्णाली प्रदेशको मुख्यमन्त्री हुँदा पनि सेवा सुविधा कानुनविपरीत लिएको भन्दै अख्तियारले छानबिन गरिरहेको छ। अख्तियार दुरुपयोग अनुसन्धान आयोग टंगाल काठमाडौंले २०८२ चैत २३ गते कर्णाली प्रदेश सरकारको मुख्यमन्त्री तथा मन्त्रिपरिषद्को कार्यालयलाई उनी मुख्यमन्त्री हुँदा लिएको तलब भत्तासहितको सुविधाको विषयमा जवाफ नै मागेको छ।

अख्तियारको पत्रमा प्रदेशका तत्कालीन मुख्यमन्त्री जीवनबहादुर शाही नागरिकता प्रमाणपत्र नं ११०६–१०३२ काठमाडौं २०३९/०७/१ ले मुख्यमन्त्री पदमा रहदा प्राप्त गरेको तलव भत्ता तथा अन्य आर्थिक सुविधासमेत प्राप्त गरेको भए सो समेतको सम्पूर्ण विवरणहरू छानबिनको सिलसिलामा आवश्यक परेको हुँदा सोको विवरण पुनः परीक्षण गर्दा फरक नपर्ने गरी यस आयोगको मेलमा यथाशीघ्र उपलब्ध गराई छानबिन कार्यमा सहयोग गरिदिनुहुन अनुरोध गरिएको स्रोतले बतायो।