काठमाडौं - विश्वकप २०२६ को क्वार्टरफाइनलमा मिकेल मेरिनो फेरि एकपटक स्पेनका नायक बनेका छन्। खेलको ८८औं मिनेटमा निर्णायक गोल गर्दै उनले बेल्जियमलाई २–१ ले पराजित गराए र स्पेनलाई सेमिफाइनलमा पुर्‍याए।

अन्तिम १६ मा पोर्चुगलविरुद्ध इन्जुरी समयमा विजयी गोल गरेका आर्सनलका मिडफिल्डर मेरिनोले यसपटक पनि बेन्चबाट मैदान प्रवेश गरेपछि केवल ११७ सेकेन्डमै खेलको नतिजा बदलिदिए।

खेल १–१ को बराबरीमा रहेको अवस्थामा बेल्जियमका पहिलो रोजाइका गोलकिपर थिबाउट कोर्टुवा चोटका कारण बाहिरिएपछि उनको स्थानमा आएका सेन्ने लामेन्सले पाउ कुबार्सीको २५ यार्ड टाढाबाट आएको प्रहार समात्न सकेनन्। फर्किएको बललाई मेरिनोले नजिकैबाट जालीको छानोमा प्रहार गर्दै स्पेनलाई अग्रता दिलाए।

यसअघि स्पेनले ३०औं मिनेटमा फाबियन रुइजको गोलमार्फत अग्रता लिएको थियो। पेड्रो पोरो र लामिन यामालको उत्कृष्ट समन्वयपछि आएको अवसरमा डानी ओल्मोको पहिलो प्रहार कोर्टुवाले रोके पनि रिबाउन्डमा रुइजले टिमोथी कास्टान्येको खुट्टाबीचबाट बल गोलपोस्टमा छिराएका थिए।

तर पहिलो हाफ सकिन चार मिनेट बाँकी रहँदा चार्ल्स डे केटेलाएरले कास्टान्येको क्रसलाई शक्तिशाली हेडमार्फत गोलमा परिणत गर्दै बेल्जियमलाई बराबरीमा फर्काए। यो गोलसँगै स्पेनको विश्वकप २०२६ मा लगातार ६४९ मिनेटसम्म गोल नखाएको कीर्तिमानी यात्रा पनि समाप्त भयो।

दोस्रो हाफमा बेल्जियमले पेनाल्टीको दाबी गरेको थियो। स्पेनका डिफेन्डर आयमेरिक लापोर्तेको हेडर आफ्नै टोलीका रोड्रीको हातमा लागेपछि बेल्जियमका खेलाडीले अपिल गरे पनि रेफ्रीले खेल जारी राखे। यता मिकेल ओयार्जाबालको प्रहार कोर्टुवाले उत्कृष्ट बचाउ गरेका थिए।

तर ७१औं मिनेटमा कोर्टुवा मांसपेशीमा चोट लागेपछि आँसु झार्दै मैदान छाड्न बाध्य भए। उनको स्थानमा आएका म्यानचेस्टर युनाइटेडका गोलकिपर सेन्ने लामेन्सले अन्तर्राष्ट्रिय करियरको तेस्रो खेल खेलिरहेका थिए। अन्तिम समयमा उनले गरेको गल्ती नै बेल्जियमको हारको मुख्य कारण बन्यो।

यस जितसँगै युरोपियन च्याम्पियन स्पेनले विश्वकपको सेमिफाइनलमा फ्रान्ससँग प्रतिस्पर्धा गर्ने भएको छ। दुवै टोलीबीचको सेमिफाइनल जुलाई १४ मा अमेरिकाको डलासमा हुनेछ।

बेल्जियमका लागि भने उपाधि जित्ने सपना क्वार्टरफाइनलमै समाप्त भएको छ भने स्पेनले विश्वकप इतिहासमा आफ्नो दोस्रो सेमिफाइनल यात्रा सुनिश्चित गरेको छ।