काठमाडौं - सन् २०२६ को फिफा विश्वकपको सेमिफाइनलमा अर्जेन्टिनाले इंग्ल्यान्डसँग भेट पक्का गरेको छ। क्यान्सस सिटीको अत्यधिक गर्मीबीच सम्पन्न रोमाञ्चक क्वार्टरफाइनलमा स्विट्जरल्यान्डलाई अतिरिक्त समयमा ३–१ ले पराजित गर्दै अर्जेन्टिना अन्तिम चारमा पुगेको हो।
खेलको सुरुवातमै अर्जेन्टिनाले अग्रता लिएपछि उसले सहज जित निकाल्ने अनुमान गरिएको थियो। खेलको १०औँ मिनेटमा कप्तान लियोनेल मेस्सीको कर्नरलाई एलेक्सिस म्याक एलिस्टरले नजिकको पोस्टबाट हल्का टच दिँदै गोल गरेपछि विश्व च्याम्पियन टोलीले उत्कृष्ट सुरुआत गरेको थियो।
तर त्यसपछि अर्जेन्टिनाले आफ्नो दबाब कायम राख्न सकेन। स्विट्जरल्यान्डले क्रमशः खेलमा पकड जमाउँदै उत्कृष्ट प्रदर्शन गर्यो र अधिकांश समय उसैले खेल नियन्त्रणमा राख्यो।
यसको फलस्वरूप ६७औँ मिनेटमा नटिङ्घम फरेस्टका विङ्गर डान एनडोयेले बराबरी गोल गरे। उनले बायाँतर्फबाट भित्र छिर्दै रिकार्डो रोड्रिगेजसँग वान-टु पास खेलेपछि अर्जेन्टिनी गोलरक्षक एमिलियानो मार्टिनेजको दुई खुट्टाबीचबाट बल गोलमा छिराउँदै खेल १–१ को बराबरीमा ल्याए।
स्विट्जरल्यान्डले खेलमा राम्रो प्रदर्शन गर्दै बराबरी गोल गरेपछि उसले खेल आफ्नो पक्षमा मोड्ने संकेत देखाएको थियो। तर बराबरी गोल गरेको केवल पाँच मिनेटपछि स्विस टोली ठूलो झट्कामा पर्यो।
स्विस स्टार फरवार्ड ब्रिल एम्बोलोलाई भिडियो सहायक रेफ्री (VAR) को समीक्षा पछि दोस्रो पहेंलो कार्ड दिँदै मैदानबाट बाहिर पठाइएको थियो।
सुरुआतमा एम्बोलोलाई अर्जेन्टिनाका लिएन्ड्रो परेडेसले फाउल गरेको जस्तो देखिएपछि रेफ्रीले परेडेसलाई पहेंलो कार्ड दिएका थिए। तर VAR ले ‘गलत खेलाडीलाई कारबाही’ सम्बन्धी नियमअन्तर्गत घटनाको पुनरावलोकन गर्न रेफ्रीलाई बोलायो। रिप्लेमा एम्बोलोले कुनै सम्पर्कबिना लडेर फाउलको नाटक गरेको स्पष्ट देखिएपछि परेडेसलाई दिइएको कार्ड फिर्ता लिइयो र यसअघि नै पहेंलो कार्ड पाइसकेका एम्बोलोलाई दोस्रो पहेंलोसहित रातो कार्ड देखाइयो।
रेफ्रीको उक्त निर्णयले एम्बोलो निराश बने भने स्विट्जरल्यान्डका खेलाडी र समर्थकहरूले त्यसप्रति तीव्र असन्तुष्टि जनाए।
१० खेलाडीमा सीमित भएपछि अर्जेन्टिनाले खेलमाथि पुनः नियन्त्रण जमायो। निर्धारित ९० मिनेटमा नतिजा ननिस्किएपछि खेल अतिरिक्त समयमा पुगेको थियो।
अन्ततः अतिरिक्त समयमा जुलियन अल्भारेजले २५ यार्ड टाढाबाट प्रहार गरेको शानदार कर्लिङ शट स्विस गोलरक्षक ग्रेगर कोबेलको पहुँच बाहिर जाँदै जाली चुम्यो। उक्त अद्भुत गोलले अर्जेन्टिनालाई निर्णायक अग्रता दिलायो।
त्यसपछि स्विट्जरल्यान्डले फेरि बराबरी गोलको खोजीमा आक्रामक प्रयास गर्यो। तर अग्रपंक्तिमा खेलाडी बढाउँदा उसले रक्षामा खाली ठाउँ छाड्यो। त्यसैको फाइदा उठाउँदै काउन्टर अट्याकमा लाउटारो मार्टिनेजले सहज फिनिस गर्दै अर्जेन्टिनाको दोस्रो गोल गरे र ३–१ को जित सुनिश्चित गरे।
यस जितसँगै लगातार दोस्रो विश्वकप उपाधि जित्ने अर्जेन्टिनाको सपना जीवित रहेको छ। अब उसले फाइनल प्रवेशका लागि सेमिफाइनलमा इंग्ल्यान्डको चुनौती सामना गर्नेछ।
0 comment