काठमाडौं - जुड बेलिङ्घमको उत्कृष्ट दुई गोलको प्रेरणादायी प्रदर्शनमा इंग्ल्यान्डले अतिरिक्त समयमा नर्वेलाई २–१ ले पराजित गर्दै फिफा विश्वकपको सेमिफाइनलमा स्थान सुरक्षित गरेको छ। मियामीमा अत्यधिक गर्मी र आर्द्रताबीच भएको रोमाञ्चक क्वार्टरफाइनल जितसँगै इंग्ल्यान्ड सन् १९६६ यता पहिलो पटक पुरुष विश्वकपको फाइनल पुग्न अब केवल एक जित टाढा रहेको छ।

प्रशिक्षक थोमस टुखेलको टोलीले भाग्यको पनि साथ पाएको खेलमा बेलिङ्घम फेरि एकपटक टोलीका उद्धारकर्ता बने। अब इंग्ल्यान्डले सेमिफाइनलमा अर्जेन्टिना वा स्विट्जरल्यान्डमध्ये एक टोलीसँग प्रतिस्पर्धा गर्नेछ।

कडा प्रतिस्पर्धात्मक खेलको ३६औँ मिनेटमा नर्वेले अग्रता लिएको थियो। आन्द्रेयास स्केल्देरुपको घुमाउरो प्रहार इंग्ल्यान्डका गोलरक्षक जोर्डन पिकफोर्डलाई झुक्याउँदै जाली चुम्न पुगेपछि नर्वेले १–० को अग्रता बनाएको थियो।

तर पहिलो हाफको इन्जुरी समयमा बेलिङ्घमले टोलीलाई खेलमा फर्काए। एन्थोनी गोर्डनको उत्कृष्ट पासलाई सहज रूपमा नियन्त्रण गर्दै उनले नर्वेका गोलरक्षक ओर्यान नाइल्यान्डलाई पराजित गरे र पहिलो हाफ १–१ को बराबरीमा समाप्त भयो।

दोस्रो हाफअघि टुखेलले दुई परिवर्तन गरे। अस्वस्थता र चोटका कारण संघर्ष गरिरहेका डेक्लान राइस तथा नोनी माडुकेको स्थानमा एबेरेची एजे र बुकायो साकालाई मैदानमा उतारियो।

दोस्रो हाफमा नर्वेले केही उत्कृष्ट अवसर सिर्जना गर्‍यो। टोर्ब्योर्न हेग्गेमले गरेको गोल एर्लिङ हालान्डले इलियट एन्डरसनलाई अनावश्यक धक्का दिएको कारण अफसाइड तथा फाउलको निर्णयसँगै रद्द भयो। त्यसपछि डेभिड मोलर वुल्फेको हेडर क्रसबारमा लागेर फर्किएको थियो।

अतिरिक्त समयको सुरुआतमै बेलिङ्घम फेरि चम्किए। विकल्प खेलाडी मोर्गन रोजर्सको प्रहार गोलरक्षक नाइल्यान्डले पूर्ण रूपमा रोक्न नसक्दा रिबाउन्डमा बेलिङ्घमले कुनै गल्ती नगरी निर्णायक गोल गर्दै इंग्ल्यान्डलाई २–१ को जित दिलाए।

यस खेलमा खासै प्रभाव जमाउन नसकेका नर्वेका स्टार स्ट्राइकर एर्लिङ हालान्ड अतिरिक्त समयको पहिलो चरणपछि मैदानबाट बाहिरिएका थिए।

यससँगै इंग्ल्यान्डले पछिल्ला ६० वर्षमा तेस्रो पटक विश्वकपको सेमिफाइनल यात्रा तय गरेको छ। सन् १९६६ मा जुल्स रिमे ट्रफी जितेपछि इंग्ल्यान्डले १९९० मा पश्चिम जर्मनी र २०१८ मा क्रोएसियासँग सेमिफाइनलमा हार बेहोरेको थियो। यसपटक भने त्यो इतिहास बदल्दै विश्वकप फाइनलमा पुग्ने लक्ष्यसहित इंग्ल्यान्ड मैदान उत्रनेछ।