काठमाडौं - अमेरिका र बेल्जियमबीच सोमबार हुने फिफा विश्वकप २०२६ को अन्तिम १६ को बहुप्रतीक्षित खेलको टिकट मूल्य केही दिनमै ३० प्रतिशतभन्दा बढी घटेपछि शनिबार साँझ भने पुनः केही बढेको छ।
टिकट मूल्यको निगरानी गर्ने सेवा टिकटडाटा डटकमका अनुसार सियाटलमा हुने यस खेलको सबैभन्दा सस्तो टिकट जुन १ मा करिब ४ हजार अमेरिकी डलरसम्म पुगेको थियो। त्यसपछि मंगलबारसम्म यसको मूल्य घटेर १,५४९ डलरमा झरेको थियो।
बोस्निया तथा हर्जेगोभिनालाई २–० ले पराजित गर्दै अमेरिका अन्तिम १६ मा पुगेपछि टिकटको न्यूनतम मूल्य फेरि बढेर २,८३६ डलर पुगेको थियो।
तर त्यसयता टिकटको मूल्य निरन्तर घट्दै गएको छ। शनिबार दिउँसो सबैभन्दा सस्तो टिकटको मूल्य १,४२३ डलरमा झरेको थियो, जुन पछिल्ला तीन दिनको तुलनामा ३२ प्रतिशतले कम हो। यद्यपि शनिबार साँझ सम्म आइपुग्दा टिकटको न्यूनतम मूल्य फेरि बढेर १,६३५ डलर पुगेको थियो।
यस पछिल्लो वृद्धिसँगै अमेरिका–बेल्जियम खेल अन्तिम १६ का आठ खेलमध्ये दोस्रो सबैभन्दा महँगो टिकट भएको खेल बनेको छ।
सबैभन्दा महँगो टिकट भने आइतबार मेक्सिको सिटीमा हुने मेक्सिको र इंग्ल्यान्डबीचको खेलको रहेको छ जहाँ सबैभन्दा सस्तो टिकटको मूल्य ३,५७४ अमेरिकी डलर पुगेको छ।
0 comment